सुदूरपश्चिम प्रदेशकै श्रीपेच मानिएको खप्तडमा पुस दोस्रो सातादेखि हिउँ पर्न थालेको छ। त्यसैले आन्तरिक पर्यटकलाई हिउँमय खप्तडमा डुलाउन डोटीका युवा पर्यटन अभिन्यता दिपकबहादुर खड्काले ‘हेली टुर प्याकेज’ ल्याएका छन्।
खप्तडको प्रवेशद्धार झिग्रानामा ‘खप्तड होमस्टे’ सञ्चालन गर्दै आएका खड्काले तीन किसिमका प्याकेज सार्बजनिक गरेका हुन्। अब धनगढीबाट ३० हजार, दिपायलबाट १० हजार र झिग्रानाबाट ८ हजार रुपैयाँको प्याकेज किनेर खप्तड घुम्न सकिनेछ।
‘प्याकेजमा दुईतर्फी हेली टिकट हुन्छ’, खड्काले सेतोपाटीसँग भने, ‘पर्यटकलाई खप्तडमा घुम्न र फोटो खिच्न केही समय दिइनेछ।’ खप्तड क्षेत्र प्रवद्र्धनका लागि आउने पत्रकारलाई झिग्रानाबाट उड्दा प्रति व्यक्ति एक हजार रुपैयाँ छुट दिइने समेत उनले जानकारी दिए।
कोभिड–१९ का कारण थलिएको पर्यटन उद्योगलाई पुर्नजीवन दिने उद्धेश्यले हेली प्याकेज बनाइएको खड्का बताउँछन्। ‘आन्तरिक पर्यटनमार्फत् पर्यटनलाई चलायमान बनाउन सस्तोमा हेली प्याकेज बनाएको हुँ’, उनले भने।
खड्काले माउन्टेन एयरसँगको सहकार्यमा प्याकेज बनाएको बताए। एउटा हेलीमा पाँच जना यात्रुलाई बसाइनेछ।
बझाङ, बाजुरा, डोटी र अछाम जिल्लाको संगमस्थल मानिन्छ खप्तड। त्यहाँ ठुलाठूला पाटन र डाँडा छन्। त्यसैगरि अपिशैपाल हिमालको मनमोहक दृश्य देखिन्छ। खप्तड जैविक विविधताको अनुपम भण्डार हो।
पछिल्लो समय खप्तड आन्तरिक पर्यटकको रोजाईमा पर्दै गएको छ। विगतमा खप्तड राष्ट्रिय निकुञ्जमा पचास वर्षसम्म खप्तड बाबाले योग, ध्यान र तपस्या गरेका थिए।
खप्तड यात्रा गर्दा न्याना कपडा र जुत्ता लगाउनु पर्ने युवा पर्यटन अभियन्ता खड्काले बताए।
सम्पर्कः
खप्तड होमस्टे
दिपकबहादुर खड्का–९८५८४४०१३७
