गृह मन्त्रालयले कच्चापदार्थ बोकेका भारतीय मालवाहक सवारीसाधनलाई ‘जाँच नगर्न’ प्रहरीलाई दिएको निर्देशनको बचाउ गरेको छ।
सोमबार विज्ञप्ति जारी गरी गृहले वैशाख २१ गते भएको उक्त निर्णयबारे प्रहरीलाई गरेको पत्राचारबारे बचाउ गरेको हो।
मन्त्रिस्तरीय निर्णय भन्दै गृहले जेठ २ गते सशस्त्र र नेपाल प्रहरीलाई ‘कच्चापदार्थ बोकेका मालवाहक भारतीय सवारीलाई जाँच नगर्नू’ भनी परिपत्र गरेको थियो।
गृहले भारतबाट कच्चापदार्थ बोकेका मालवाहक गाडीलाई ट्राफिक प्रहरीले अनावश्यक दुःख दिएको गुनासो आएपछि औद्योगिक क्षेत्रमा असहजता ल्याउनका लागिमात्र सो परिपत्र गरेको दाबी गरेको छ।
गृहले कुनै मालवाहक सवारीसाधनमा गैरकानुनी ओसारपसार भएको शंका लागेमा नेपाल प्रहरी र सशस्त्र प्रहरीलगायत अन्य सम्बद्ध निकायले रोक्न र जाँच गर्न सक्ने बताएको छ।
‘औद्योगिक कच्चापदार्थ आयात हुँदा ओभरलोडको कारण देखाएर ट्राफिक प्रहरीले दुःख दिने तथा दुई तीन दिनसम्म राखिदिने गुनासो सम्बोधन गर्न र सडकको भारबहन क्षमता नियमन गर्नुपर्ने कानुनसम्मत दायित्व अरु नै निकायको भएको भनी सम्बद्ध निकायबाट मात्र त्यसको नियमन होस् भनी परिपत्र गरिएको हो,’ गृहको विज्ञप्तिमा उल्लेख छ, ‘प्रवेश नाकामा कुनै पनि मालवाहक ढुवानीका साधनलाई प्रवेशबिन्दुमै भन्सार, राजस्व, सीमा प्रहरी, सशस्त्र प्रहरी, क्वारेन्टाइनसमेतका निकायबाट चेकजाँच हुने गरेको विदितै छ।’
गृहले विज्ञप्तिमा गैरकानुनी गतिविधि नियन्त्रण गर्न कुनै पनि निकायलाई अवरोध पुर्याउन त्यस्तो निर्णय नगरिएको जनाएको छ।
गृहले तराईका २२ जिल्लामा त्यस्तो परिपत्र गरेको थियो। गृहले त्यस्तो परिपत्र गरेपछि गैरकानुनी गतिविधि बढ्न सक्ने भन्दै प्रहरीले गुनासो गरिरहेको थियो।
भन्सार जाँचपास गर्दा झूटो प्रज्ञापन पत्र बनाएर तस्करी हुने गरेको पाइएपछि प्रहरी तथा सशस्त्र प्रहरीले मालवाहक सवारीसाधनमा कडाइ गर्ने गरेको थियो।
प्रहरीले मालवाहक सवारीमा कडाइ थालेपछि उद्योगी व्यवसायीले गृहमा गुनासो गरेका थिए। बढी भार बोकेका सवारीसाधनलाई ट्राफिक प्रहरीले रोकेर सडकमै कारबाही गर्ने गरेको थियो। भारबहन क्षमताको कानुनसम्मत पालना नदेखिए ट्राफिकले त्यस्ता सवारीलाई कार्यालयमै लगेर अनुसन्धान तथा कारबाही गर्ने गरेको थियो।
यो पनि :
भारतीय मालवाहक गाडी जाँच नगर्न प्रहरीलाई गृहमन्त्री थापाको निर्देशन
.JPG)
