प्रदेश नम्बर पाँचका मुुख्यमन्त्री शंकर पोखरेलले कोरोनाभाइरस विरूद्धको लडाइँका लागि सबै नागरिकले सरकारले दिएको आदेश पालना गर्न आवश्यक रहेको बताएका छन्।
बुधबार मुख्यमन्त्री कार्यालयबाट प्रदेशवासीलाई सन्देश दिँदै मुख्यमन्त्री पोखरेलले सरकारले घोषणा गरेको लकडाउन जनताको सुरक्षाको लागि नै भएको भन्दै घर बाहिर ननिस्कन आग्रह गरेका हुन्।
‘लकडाउनमा सबै सेवा बन्द हुुँदैनन्, खाद्यान्न स्वास्थ्य, सुुरक्षा सम्बन्धित सेवा जारी रहन्छन्। त्यसैले सबै नागरिकले आफ्नै सुरक्षाका लागि घरबाहिर ननिस्कनुहोस्,’ मुख्यमन्त्री पोखरेलले भने।
उनले सरकारले जनतालाई भोकै मर्न नदिने र जहाँ समस्या पर्छ त्यहाँ प्रदेश सरकार आइपुग्ने भन्दै कोरोनाविरूद्धको साझा लडाइँमा साथ दिन आग्रह गरे।
‘कोरोनाविरूद्धको साझा लडाइँलाई सबैले साथ दिऊँ जनतालाई भोकै मर्न दिँदैनौं, जहाँ समस्या पर्छ त्यहाँ प्रदेश सरकार आइपुुग्छ।’
मुख्यमन्त्री पोखरेलले कोरोनाभाइरस नफैलियोस् भनी गरिएको लकडाउनको अवधि लम्बिन पनि सक्ने बताए।
मुख्यमन्त्री पोखरेलले संक्रमितलाई गाउँ र बस्तीमा जान नदिन सजकता आवश्यक रहेको भन्दै सरकारी आदेश पालना गर्नु सबै नागरिकको कर्तव्य भएको बताए।
उनले कोरोनाभाइरस नेपालमा नभएकोले बाहिरबाट आएका संक्रमितबाट सर्ने भन्दै बाहिरका मानिसहरूको आवतजावत रोक्न सके यो लडाइँ जित्न सकिने बताए।
‘संयम राख्नुुपर्छ, आत्मविश्वासले लडाइँलाई जित्न सकिन्छ, घरभित्रै बसेर पोषिलो खानेकुरा खाने गरौं र आधिकारिक सूचनामा मात्र विश्वास गरौं,’ उनले भने।
मुख्यमन्त्री पोखरेलले प्रदेशमा चार वटा कोरोना विशेष अस्पताल निर्माण गरेको भन्दै रुपन्देहीमा लुम्बिनी प्रादेशिक अस्पताल बुटवल र धागो कारखानामा रहेको अस्थायी कोरोना अस्पतालमा उपचार हुने बताए।
त्यस्तै, भैरहवाको भीम अस्पताललाई कोरोना विशेष अस्पतालको रूपमा विकास गरिएको छ भने दाङको बेलझुण्डी र बाँकेको क्यान्सर अस्पताललाई पनि कोरोना विशेष अस्पतालको रूपमा प्रयोगमा ल्याउने मुख्यमन्त्री पोखरेलको भनाइ छ।
मुख्यमन्त्री पोखरेलले प्रत्येक ठाउँमा आइसियुको रूपमा विकास गर्न दुई/दुई करोड रुपैयाँ उपलब्ध गराइएको जानकारी दिँदै प्रदेश सरकारले अस्पताल सञ्चालन गर्न कुनै कसर बाँकी नराखेको बताए।