पेरिसडाँडामा आइतबार बसेको सत्तारूढ नेपाल कम्युनिष्ट पार्टीको सचिवालय बैठक भोलि फेरि बस्ने गरी सकिएको छ।
हालै सकिएको स्थायी कमिटी बैठकका निर्णय कार्यान्वयन गर्न बसेको सचिवालय बैठकमा मुख्य गरी मन्त्रिपरिषद पुनर्गठनबारे छलफल सुरू भए पनि कुनै निर्णय भने भएको छैन।
प्रवक्ता नारायणकाजी श्रेष्ठले चार वटा विषय बैठकका लागि पेश भए पनि आज मन्त्रिपरिषद पुनर्गठनको नीतिगत र मापदण्डजस्ता विषयमा मात्रै छलफल भएको जानकारी दिए। उनकाअनुसार मन्त्रिपरिषद पुनर्गठन गर्दा को–को मन्त्री हुँदैछन् र को बाहिर निस्कछन् भन्ने नाममा आज छलफल भएन।
अर्थ, सूचना सञ्चार तथा प्रविधि र शहरी विकास गरी तीन वटा मन्त्रालय लामो समयदेखि खालि नै छन्। यी खालि रहेका मन्त्रालयमा मात्रै मन्त्रीहरू पठाइन लागेको वा अरू मन्त्री पनि पुनर्गठनमा पर्न लागेका हुन् भन्नेबारे प्रवक्ता श्रेष्ठले खुलाएनन्।
सरकारका कामकारबाही अझै प्रभावकारी बनाउन मन्त्रिपरिषद पुनर्गठन गर्न लागेको श्रेष्ठको भनाइ छ। ‘विभिन्न कोणबाट विभिन्न विकल्पमा छलफल भएको छ,’ उनले भने।
तपाई र वामदेव गौतमको नाम पनि मन्त्री हुनेमा चर्चामा छ भन्ने पत्रकारको प्रश्नमा प्रवक्ता श्रेष्ठले भने, ‘यसबारे केही छलफल भएन। मभित्र मनमै पनि छलफल भएको छैन। बैठकमा पनि छलफल भएको छैन।’
