भारतमा पहिलो पटक कुनै महिला राज्य क्रिकेटको अध्यक्ष बनेकी छन्।
रूपा गुरूनाथ बिहीबार तमिलनाडु क्रिकेट एसोसिएशन(टिएनसिए)को नयाँ अध्यक्ष चुनिएपछि पुरूषको मात्र दब्दबा रहँदै आएको भारतीय क्रिकेटको नेतृत्वमा पहिलोपटक महिला चुनिएकी हुन्।
उनी टिएनसिएको ८७ औं वार्षिक आमसभाबाट अध्यक्षमा निर्विरोध अध्यक्ष चयन भएकी हुन्। रूपा भारतीय क्रिकेट बोर्डका पूर्व अध्यक्ष एन श्रीनिवासनकी छोरी हुन्।
त्यसो त उनी अध्यक्ष बनेको औपचारिक घोषणा भने गरिएको छैन। सर्वोच्च अदालतका कारण सो घोषणा नभएको हो।
तामिलनाडु क्रिकेटको चुनावी मामिला यतिबेला अदालतमा विचाराधीन छ।
अदालतले चुनावको नतिजा आफ्नो आदेशपछिमात्र घोषणा गर्न सर्त राखेकाले उनी अध्यक्ष भएको औपचारिक घोषणा नगरिएको हो। रूपाले बुधबार अध्यक्ष पदका लागि आफ्नो नामाकंन भरेकी थिइन्।
त्यस्तै बिहीबार नै सौरभ गांगुली बंगाल क्रिकेट संघको अध्यक्षमा चुनिएका छन्। सौरभ पनि उक्त पदमा निर्विरोध निर्वाचित भएका हुन्।