पर्यटन प्रबर्धन गर्ने उद्धेश्यले कास्कीको पर्यटकीय गाउँ ताङतिङमा चैते दसैं मेला सुरु भएको छ।
ताङतिङ युवा क्लबको आयोजनामा सोमबारदेखि रजत महोत्सव सुरु भएको हो। 'पहिले मनोरञ्जन र खेल विकासका लागि महोत्सव गरिन्थ्यो,' क्लबका अध्यक्ष दिलिप गुरुङले भने, 'अचेल पर्यटन प्रबर्धनमा टेवा पुर्याउन महोत्सव गर्दैआएका छौं।'
महोत्सवमा अन्तरगाउँ भलिबल, ठेलो, डोरी तान्ने र बास्केटबल प्रतियोगिता भैरहेका छन्। प्रतियोगितामा सेरोफेराका गाउँका साथै पोखराबाट समेत सहभागि प्रतिस्पर्धामा उत्रेका छन्।
महोत्सवको अर्को आकर्षण साँगितिक कार्यक्रम रहेको छ। गायक विनोद बानियाँको समूह, जी ९ व्याण्ड, तरेली साँस्कृतिक समूह र स्थानीय कलाकारले दर्शकलाई तताईरहेका छन्।
बिहिबारसम्म चल्ने महोत्सव उद्घाटन दुधपोखरी तमु समाजका पूर्व अध्यक्ष हर्कध्वज गुरुङले गरे। महोत्सव भर्न छिमेकी गाउँहरु सिक्लेस, खिलाङ र पोखरा लगायत गाउँबाट आगन्तुक ओइरिएका छन्।
विदेसिएका ताङतिङे समेत गाउँ फर्केका छन्। 'मेला सम्झनेवित्तिकै गाउँ आउन मन लाग्छ,' दुबईबाट मेलाकै लागि भनेर आएका एकजंङ गुरुङले भने, 'चैते
मेला गाउँ चिनाउने माध्यम बनेको छ।'
बेलायत र हङकङबाट समेत गृह थलो फर्केनेको संख्या उल्लेख्य छ। बेलायतबाट तर्कजंङ गुरुगको परिवारै आएको छ। 'संसारको जुनसुकै कुनामा पुगेपनि आफ्नो जन्मथलोको मायाले तानेर ल्याउँदो रहेछ,' उनले भने।
पोखराको उत्तरपूर्वी गाउँ ताङतिङमा केही वर्षदेखि आन्तरिक पर्यटक बढ्दै गएका छन्। गाउँको फेदीसम्म मोटर बाटो खुलेपछि पर्यटक बढेका हुन्।
पोखराको काहुँखोलाबाट गाउँको फेदीसम्म २३ किलोमिटरमा गाडी चल्छ। गाडीबाट ओर्लेर आधा घन्टा हिँडे गाउँमा पुगिन्छ। बर्खामा भने चासो भन्ने ठाउँसम्म मात्रै गाडी चल्छ। त्यहाँबाट तीन घन्टा उकालो चढेपछि गाउँ पुगिन्छ।
गाउँका १७ घरमा होमस्टे सुविधा छ। एउटा गेष्ट हाउस पनि भर्खरै सञ्चालनमा आएको छ। 'होमस्टे गराउने कुनै घरमा दुई बेड छन् भने कुनैमा चार,' होमस्टेकी अध्यक्ष दुजामाया गुरुङ भन्छिन्,' हामी पाहुनालाई स्थानीय परिकारहरु खुवाउँछौं।'
हिमालको काखमा रहेको ताङतिङबाट अन्नपूर्ण प्रथम, दोस्रो, तेस्रो र लमजुङ हिमालको मनोरम दृश्य देखिन्छ। गाउँबाट पारी सिक्लेस गाउँ छ।
घलेगाउँ, ताङतिङ हुँदै सिक्लेसबाट घलेखर्क निस्कने पदमार्ग विकास गर्न सके यो क्षेत्रको आर्थिक स्थिति उकासिन सक्छ। 'हामी त्यसका लागि एक्याप, टान र पर्यटन बोर्डसँग सहकार्य गर्दैछौं,' मेलाका आर्थिक संयोजक राजेश गुरुङले भने।
गुरुङ बाहुल्य ताङतिङ गाउँमा दुई सय घर छन्। ढुँगाले बनेका घरहरु चिटिक्क छन्। आमा समूहको सक्रियतामा गाउँ सफा छ। लघु जलविद्युत आयोजनाको बिजुली भएकाले गाउँ झलमल्ल बन्छ।
पर्यटकका लागि शिशु स्याहार केन्द्र पनि आकर्षण बन्दै आएको छ। पाँच वर्षसम्मका बच्चाहरुलाई त्यहाँ दिनभर राखिन्छ। अभिभावकबाट दालचामल र तरकारी संकलन गरेर केन्द्र चलाइएको छ।
गाउँमा रहेको हिमालय मिलन माविका कक्षा १० मा पढ्ने विद्यार्थीलाई अनिवार्य छात्राबासमा बस्नु पर्ने नियम छ। छात्राबासमा राखेर पढाउँदा विद्यार्थीको रिजल्ट राम्रो आउने गरेको शिक्षक जसबहादुर गुरुङले बताए।
मेलाको पूर्व सन्ध्यामा गाउँमा 'नौंचु पैगी लामा महायान बौद्ध गुम्बा' उद्घाटन गरिएको छ। गुम्बामा शाक्यमुनि बुद्ध, अवलोकितेश्वर र गुरु पद्यसंभवका मूर्ति छन्।
'गुम्बा धार्मिक आस्था केन्द्र त हुँदै हो,' लामा थुप्तेन ऐशेले भने,' गुम्बा पर्यटकीय गन्तव्य समेत बन्नेमा हामी आशाबादी छौं।'
