कवि तथा गीतकार क्षेत्रप्रताप अधिकारीको आइतबार बेलुका निधन भएको छ। शनिबार बेलुका हृदयाघातपछि उनलाई गंगालाल हृदय केन्द्रमा भर्ना गरिएको थियो। दिनभरिको उपचारपछि पनि स्वास्थ्यमा कुनै सुधार आउन नसकेका उनलाई चिकित्सकहरुले आइतबार बेलुकी ८:१४ मा मृत घोषित गरेका थिए।
थुप्रै राष्ट्रिय गीत तथा कविताहरुका सर्जक अधिकारी कुनै जमानामा साझा यातायातमा कण्डक्टर थिए। नारायणगोपाल, बच्चुकैलाश, कुन्ती मोक्तानलगायत गायकगायिकाको स्वरमा उनका रचना संगीतबद्ध भएका छन्। उनी पञ्चायतकालमा शिक्षा सहायकमन्त्री समेत भएका थिए। ७२ वर्षीय अधिकारीका दुई छोरा छन्।
उनको शव मृत्युपछि दान दिने निर्णय उनी आफैँले गरेका थिए। बिपी कोइराला स्वास्थ्य विज्ञान प्रतिष्ठानलाई उनले शरीर दान गरेका थिए।