संसद सचिवालयले बुधबारको व्यवस्थापिका संसदको बैठकमा बेपत्ता भएका व्यक्तिको छानबिन, सत्य निरुपण तथा मेलमिलाप आयोग विधेयक प्रस्तुत गर्ने कार्यसूचि सार्वजनिक गरेको छ।
प्रमुख प्रतिपक्ष दल एमाओवादीको चर्को दबाब पश्चात सरकारले संसद सचिवालयमा दर्ता गरेको विधेयकका केही विवादास्पद प्रावधानका कारण उक्त विधेयकको राष्ट्रिय तथा अन्तर्राष्ट्रिय क्षेत्रमा समेत चर्को विरोध भइरहेको छ।
गोरखाका कृष्णप्रसाद अधिकारीको हत्याको आरोपमा आफ्नो कार्यकर्तालाई झुठा मुद्दामा फसाएको दाबी गर्दै त्यसको विरोधमा प्रमुख प्रतिपक्ष दल एमाओवादीले संसदको कारबाही अबरुद्ध गर्ने चेतावनी दिएको भए पनि कार्यव्यवस्था परामर्श समितिको सुझाव अनुसार सचिवालयले उक्त विधेयक सदनमा पेश गर्ने कार्यक्रम राखेको हो।
सचिवालयले सार्वजनिक गरेको कार्यसूचि अनुसार बुधबारको बैठकमा थप तीन वटा विषयहरुले प्रवेश पाउने कार्यक्रम छ। सुरक्ष विशेष समितिका जेष्ठ सदस्य कुलबहादुर गुरुङले समितिको सभापतिको हैसियतमा गत निर्वाचनमा नेपाली सेनाको परिचालन गर्ने निर्णय अनुमोदन प्रतिवेदन पेश गर्ने छन्।
त्यसैगरी सभामुखले यसअघिको संसदको बैठकमा गठन हुन नसकेको संसद मातहत रहने एक प्रमुख समिति सार्वजनिक लेखा समिति गठन गर्ने निर्णय सहित समितिमा रहने सदस्यहरुको नाम सहमतिका लागि सदनमा पेश गर्ने छन्।
कार्यसूचीको तेस्रो कार्यक्रम अनुसार एमालेका सभासद भरतमोहन अधिकारीले बैदेशिक रोजगारीमा जाने करिब ३५ लाख भन्दा बढी नेपाली नागरिकहरु देशमा रोजगारीको अबस्था सृजना हुन नसक्दा बाध्यताले विदेशिनु परेको र उनीहरुले विदेशी श्रमबजारबाट देशमा भित्र्याउने रेमिट्यान्स बार्षिक करिब ४ सय अर्ब रुपैया बराबर अर्थात देशको कुल ग्राहस्थ उत्पादनमा कृषिपछि दोस्रो ठूलो करिब २३ प्रतिशत भएकोले उक्त रेमिट्यान्स रकम राष्ट विकासको हितमा लगाउन के गर्न सकिन्छ भन्ने जरुरी सार्वजनिक महत्वको प्रस्ताव पेश गर्नेछन्।
प्रकाशित मिति: 2014-04-16 11:53:21
