व्यवस्थापिका संसदको बुधबारको बैठक एनेकपा माओवादीले सुरु हुनेबित्तिकै अवरुद्ध गरेका छन्। फुजेल हत्याकाण्डमा आफ्ना कार्यकर्ताबिरुद्ध सरकारले मुद्दा चलाएको भन्दै एमाओवादी सरकारसँग रुस्ट बनेको छ।
संसदको बुधबारको बैठक सत्य निरुपण विधेयक प्रस्तुत गर्ने कार्यसूची थियो।
संसदको बैठकमा १२:५ मा घण्टी बज्यो। सभामुखले सदनको कारबाही सुरु गर्नासाथ एमाओवादीका सभासद उठे।
सभामुखले एमाओवादीका बाबुराम भट्टराईलाई समय दिए।
एमाओवादी नेता भट्टराईले प्रतिपक्षको हैसियतले मात्र होइन, १२ बुँदेदेखि शान्ति प्रक्रियाको प्रमुख हिस्सेदार भएकाले अहिले कतै यो शान्तिप्रक्रिया नै गलत दिशातर्फ त गइरहेको त छैन भन्ने संकेत प्राप्त हुन थालेको बताए।
उनले भने, 'शान्ति प्रक्रियाका चारवटा प्रमुख पक्ष रहेका थिए कि पहिलो सेना समायोजन, दोस्रो मानवीय पक्ष अर्थात द्वन्द्वको समयमा भएका घटनाको उचित समाधान, तेस्रो संविधानसभाद्धारा संविधान निर्माण र चौथो वैज्ञानिक भुमिसुधार हुन्। यी मध्ये अहिले सेना समायोजनको कुरा मात्रै पूरा भए पनि द्वन्द्वकालीन अबस्थाका मुद्दामा एकपक्षीय ढंगले कारबाही चलाउने? यो घटना के हो सबैले गएर बुझे हुन्छ।'
भट्टराईले आफू गोरखाको फुजेलमा भएको घटनास्थल क्षेत्रको सभासद् पनि भएको उल्लेख गर्दै घटनालाई नबुझी टिआरसी विधेयक र आयोग नबन्दै त्यसको मुखैमा द्वन्द्वकालीन मुद्दाहरु व्यूँत्याएर कारबाही गर्न खोजिएको आरोप लगाए।
उनले द्वन्द्वकालीन घटनाका बारेमा दक्षिण अफ्रिकाको उदाहरण दिँदै हिजै मात्रै न्यूयोर्क टाइम्समा राजनीतिक र अपराधिक घटनालाई राजनीतिक घटनालाई अदालतले नभई राजनीतिक ढंगले हल गर्नुपर्छ भनेको उल्लेख गरे। उनले भने, 'तर यहाँ सरकारबाट यो कदम अघि बढ्दै छ। गत ३० गते भएको तीन दलीय बैठकमा सबै नेताहरुले यो मुद्दा चल्न सक्दैन भन्ने भनाइ राखेका थिए। तर अहिले प्रम एक्लैले यो मुद्दा अघि बढाउनुले आशकां लागेको छ कि उहाँ कोबाट चल्नु भएको छ? हिजो गिरिजाले पनि शान्ति प्रक्रियामा मलाई असयोग गरी शान्ति प्रक्रिया भगं गर्ने षड्यन्त्र भएको छ भन्थे। अहिले लाग्छ त्यो षडयन्त्रमा अहिलेका प्रम नै त थिएनन्?'
उनले फुजेल घटनामा पक्राउ परेका ११ जनालाई रामप्रसाद पौडेलसहितलाई हिजो छानविन गरी छाडेकोमा अहिले प्रमले मुद्दा चलाउन ठाडो आदेश कसरी दिनुभयो भनी प्रश्न गरे। उनले भने, यो शान्तिप्रक्रिया संग संबन्धित विषय हो। हिजो न्यूयोर्क टाइम्समा सम्पादकीय छापिएको छ। त्यसले नेपालमा उत्तर र दक्षिणबाट खेल्न लागेको छनक यो सम्पादकीयबाट आउँछ। यो घटनालाई हामी सामान्य रुपमा लिन सक्दैनौ। यो मुद्दा फिर्ता नगरिएसम्म सदनको कारबाही अबरोध गर्न बाध्य बनेका छौँ।'
उनले यसो भनेपछि सभामुखले प्रतिपक्षले अबरोध गरेको अबस्थामा सदन अगाडि बढ्न नसक्ने भन्दै सदन एक घण्टाको लागि अबरोध गरेका छन्।