एमाओवादीले फुजेल हत्याकाण्डको मुद्दाको बिषयलाई लिएर बुधबार संसद बैठक अबरुद्ध गरेपछि फेरि दिउँसो अढाइ बजे संसद बैठक सुरु भएको छ।
बैठक पुन: सुरु भएलगत्तै एमाओवादीका सभासद् जनार्दन शर्माले उठेर २०४७ सालपछि निर्वाचन पश्चात त्यतिबेला रुकुम रोल्पामा भएका घटना सम्झना भएको बताए।
उनले भने, 'प्रधानमन्त्रीले अहिले संविधानसभाले संविधान निर्माण गर्न र शान्ति प्रक्रियालई अगाडि बढाउन लागेको बेला युद्धकालीन मुद्दा उठाएर के गर्न खोजेको हो? २०४८ साललाई पुनरावृति दिन खोजेको हो?'
उनले यस्ता कुरा किमार्थ नहुने बताउँदै विगतको कुरा उठाउने हो भने प्रधानमन्त्रीले विमान अपहरण गराएका थिए, उनलाई पनि मुद्दा लगाउने हो भनी प्रश्न गरे।
उनले भने, 'शान्ति प्रक्रियामा अहिले फेरि द्वन्द्व चाहेको हो भने घोषणा गर्नु पर्यो, होइन भने अन्तरिम संविधान र शान्ति सम्झौता विपरीत जाने र बलमिच्याइँ गर्ने? हामीलाई स्वीकार्य छैन। तुरुन्त थुनिएका व्यक्ति रिहा नगरेसम्म, सबै मुद्दाहरुलाई मेलमिलाप आयोग मार्फत समाधान गर्ने कार्य नगरेसम्म बैठक चल्दैन।'
उनको भनाइपछि सभामुखले बिहीबार ३ बजेसम्मका लागि संसद स्थगित गरे।