गोरखाको फुजेलगाउँका कृष्णप्रसाद अधिकारीको हत्या प्रकरणमा संलग्न भएको आरोपमा आफ्ना कार्यकर्ताहरुलाई पक्राउ गरी मुद्दा चलाएको विरोधमा सरकारसँग कुनै वार्ता नगर्ने घोषणा गरेको एमाओवादीले अन्ततः सरकारसँग बुधबार बार्तामा बसे पनि विफल भएको छ।
अधिकारीको हत्याको आरोपमा एमाओवादीका कार्यकर्ताहरुलाई मुद्दा चलाउन लागेको विरोधमा बुधबारको संसदको बैठक अबरुद्ध गरेपछि सदनको कारबाही सुचारु गर्न एमाओवादी नेताहरुले प्रधानमन्त्री सुशील कोइरालासँग बार्ता गरेका थिए।
बैठक अबरुद्ध भएलगत्तै सभामुख सुवासचन्द्र नेम्वाङको पहलमा संसद भवनमा सरकारमा सहभागी दलका नेता सहित एमाओवादीका नेताहरुले समस्याको समाधानबारे छलफल गरेका थिए।
संसद भबन नयाँबानेश्वरमा बसेको बैठकबाट बाहिर निस्किएका एमाओवादी प्रमुख सचेतक गिरिराजमणि पोख्रेलले सेतोपाटीसँग कुरा गर्दै भने, ‘सदनको कारबाही सुचारु गर्न अहिले सरकारसँग भित्र कुराकानी भएपनि बुधबारको बैठकमा कुनै सहमति हुन सकेन।'
आफ्नो पार्टीको तर्फबाट नेताहरुले नेपालको अन्तिरिम संविधान, शान्ति संझौता, पटक पटक भएका सहमति र समझदारीलाई लत्याएर हालै सरकारले युद्दकालिन मुद्दाहरुलाई व्यूताउने, धरपकड गर्ने कामले समग्र शान्ति प्रक्रियालाई प्रभावित गर्ने भएकोले तत्काल यस्ता व्यवहार सच्याउन सरकारलाई आग्रह गरेका थिए।
'हामीले द्वन्द्वकालका सबै मुद्दाहरु सत्यनिरुपण तथा मेलमिलाप आयोगभित्र पर्ने भएकोले यी सबै विषय पछि बन्ने आयोग मार्फत टुग्याउन फुजेल गाउको घटनाको मुद्दापनि फिर्ता लिन सरकार र खासगरी प्रधानमन्त्री सुशील कोइरालालाई आग्रह गर्यौँ,' पोख्रेलले भने।
तर एमाओवादीको आग्रहलाई घुमाउरो पाराले अस्वीकार गर्दै मुद्दा फिर्ता गर्ने विषय अदालतको क्षेत्राधिकारभित्र परेकोले केही कानुनी जटिलता भएको भन्दै तत्काल फिर्ता गर्न नसक्ने जानकारी प्रधानमन्त्रीले दिएका थिए। एमाओवादी नेता बाबुराम भट्टराईले सदनमा बोल्दा प्रधानमन्त्री कोबाट परिचालित छन् भन्दै कसैको दबाबमा शान्ति विरोधी भएको भन्ने आरोपको बचाउ गर्दै कोइरालाले आफू एमाओवादीको मागका बारेमा सकारात्मक भएको र आफ्ना बारेमा जुन आरोप लागेको छ त्यो सत्य नभएको दावी गरेका थिए।
बैठकमा एमाओवादीको माग अनुसार तत्काल मुद्दा फिर्ता गर्नसक्ने आश्वासन दिन सरकार र सत्तारुढ दलले नसकेपछि बुधबारको बैठक विना निष्कर्श टुंगिएको थियो।
त्यसपछि सभामुख नेम्वाङले सदनको बैठक पुनः संचालन गर्न खोजेपनि एमाओवादीका सबै सभासदहरुले सदनमा उभिएर विरोध जनाएपछि सभामुखले बिहिबारसम्मका लागि बैठक अन्त्य गरेका थिए।