सगरमाथा आरोहण गर्ने क्रममा वेसक्याम्पमाथि गएको हिमपहिरोमा परी १४ जनाको मृत्यु भएको छ। यस्तै घटनामा परी केही अझै हराइरहेको बताइएको छ।सगरमाथा प्रदुषण नियन्त्रण समितिका अनुसार सगरमाथा आधार शिविर र शिविर १ बीचमा आज बिहान पहिरो गएको हो ।
उनीहरुको शव सिम्रिक एयरको हेलिकप्टरबाट आधार शिविर ल्याइएको छ। अन्यको पहिचानका लागि सम्बन्धित ट्रेकिङ अफिसमा बुझ्ने काम भइरहेको छ । पहिरोमा परी गम्भीर घाइतेमध्ये फुरका २४ वर्षीय फुरी शेर्पालाई उपचारका लागि हेलिकप्टरमार्फत काठमाडौं ल्याइएको छ ।
अल्पाइन एसेन्टलगायत कम्पनीका गाईडहरु पहिरोमा परेका थिए । मृतकमध्ये चारजनाको सनाखत भएको छ ।
हिम पहिरोमा पुरिएर नाम्चे-९ थाम दोर्जी शेर्पा, त्यहीँका तेन्जिङ छेतार शेर्पा, नाम्चे-५ थोमोका आङछिरिङ शेर्पा र नाम्चे-४ फुर्तेका मिङमानुरु शेर्पाको शव पहिचान भएको छ ।
चार वटा हेलिकप्टरमा नेपाली सेेना, प्रहरी र सशस्त्रको उद्दार टोली खटिएको सोलुखुम्बुका प्रहरी नायब उपरीक्षक बद्रीबिक्रम थापाले बताए ।
