वाणिज्य तथा आपूर्ति मन्त्री सुनिलकुमार थापाले बजारमा देखिएको पेट्रोलियम पदार्थको अभाव सोमबारबाट अन्त्य भई आपूर्ति सहज हुने दाबी गरेका छन।
रिपोर्टर्स क्लब नेपालले शुक्रवार आयोजना गरेको साक्षात्कारमा उनले सञ्चय कोषबाट भारतीय आयल निगमलाई आजै दुई अर्ब ५० करोड रुपैया पठाईसकिएको भए पनि शनिबार र आईतवार भारतमा बिदा हुने भएकोले सोमबारबाट आपूर्ति सहज हुने बताए।
साक्षात्कारमा मन्त्री थापाले भारतमा भईरहेको निर्वाचन र केही बक्यौदा रकम भूक्तानीको विषयले आपूर्ति सहज हुन नसक्दा समस्या उत्पन्न भएको उल्लेख गर्दै आगामि मन्त्रिपरिषदको बैठकले भारतीय आयल निगमको बाँकी २ अर्ब ५० करोड रुपैया समेत भूक्तानी गर्ने दाबी गरे।
उनले भने,'अहिले सरकारको सम्पूर्ण ध्यान पेट्रोलियम पदार्थको आपूर्ति सहज गराउने दिशामा केन्द्रीत छ। अहिले पनि भण्डारमा तेल छ तर वितरण ब्यवस्थापनमा केही समस्या उत्पन्न भएकोले मात्रै अभाव देखिएको हो। काठमाडौमा दैनिक ३५० किलो लिटर खपत हुन्छ तर अहिले हामिले २५० किलो लिटर मात्रै दिन सकिएको छ। तर हामिसँग भण्डारमा अझै २३ हजार किलो लिटर स्टक बाँकी छ, डराउनु पर्ने अवस्था छैन।'
मन्त्री थापाले सरकार अहिले मुल्य बृद्धि भन्दा पनि आपूर्ति सहज गर्ने प्रयासमा रहेको उल्लेख गर्दै संसदले गठन गरेको छानविन समितिको प्रतिवेदन आएपछि मात्रै मुल्य समायोजनको विषयमा निर्णय हुने जानकारी दिए। उनले भने–अहिले तत्काल पेट्रोलियम पदार्थको मुल्य बृद्धि हुँदैन।
मन्त्री थापाले आफ्नो मन्त्रालय मातहतको नेसनल ट्रेडिङ, साल्ट ट्रेडिङ र नेपाल आयल निगमको अवस्था र कामकारबाहीको विषयमा छिट्टै स्वेत पत्र जारी गरेर जनतालाई उत्कृष्ट सेवा दिने दिशामा अघि बढाउने घोषणा समेत साक्षात्कारमा गरे।
उनले भने,'मेरो मन्त्रालयलाई अहिलेसम्म कम महत्व दिइदै आएको रहेछ, मैले यो धेरै काम गर्न सक्ने महत्पूर्ण मन्त्रालयको रुपमा देखेको छु। सोही अनुसार अघि बढाउँछु।
सहमति र मेलमिलापको बाटोबाटै सत्य निरुपण तथा मेलमिलाप आयोग सम्बन्धी मस्यौदालाई अघि बढाउनु पर्नेमा जोड दिदै उनले द्धन्दले मुलुकको आर्थिक विकास धेरै पछि धकेलिएकोले अब सहमतिबाटै त्यसलाई तिब्रता दिनु पर्ने आवश्यकता औल्याए।
उनले आयोगको ऐन सर्वोच्च अदालतले दिएको आदेशको सम्मान गर्दै पारित गर्नु पर्नेमा समेत साक्षात्कारमा जोड दिए।