एमाले वरिष्ठ नेता माधवकुमार नेपालले आगामी अधिवेशनमा अध्यक्षमा आफ्नो उम्मेदवारीको औचित्य खुलाउन शुक्रवार अनलाइन पत्रकारहरुलाई डाके।
बानेश्वरस्थित अर्याल होटलको हलमा नेपाल पोलिटव्यूरो सदस्य सुरेन्द्र पाण्डेलाई दायाँ र केन्द्रीय सदस्य गोकर्ण विष्टलाई बायाँ राखेर बसेका थिए।
आफू नयाँ पुस्ताको नेतृत्व गरेर अधिवेशनमा जान लागेको घोषणा उनले गरे। त्यसअघि कम्युनिष्ट सिद्वान्तदेखि जनताको बहुदलीय जनवाद (जबज) बारे उनले लामै प्रवचन दिए।
टिममा को को हुन सक्छन् भन्ने संवाददाताहरुको प्रश्नमा नेपालले भने, 'सुरेन्द्रजी, घनश्याम भुषाल, गोकर्ण विष्ट, भीम रावल कति जनाको नाम लिऊ।'
आफू पहिला महासचिव मात्र भएकाले एक पटकलाई अध्यक्षमा उठ्न लागेको बताए। त्यसपछिको नेतृत्व नयाँ पुस्तामा जानुपर्ने धारणा पनि उनले व्यक्त गरे।
आफ्नो टिममा नेता थपिने क्रम जारी रहने दावी नेपालले गरे। 'अहिले अदृश्यहरु पनि ल्याउँछौं,' नेपालले भने, 'विद्वान, जोदाहा पनि आउँदैछन्।
पार्टीमा पुस्तान्तर गर्न सजिलो होस् भनेर पार्टी अध्यक्ष सहित कार्यकारी पदहरुमा सत्तरी वर्षको हद तोक्नुपर्ने धारणा उनले व्यक्त गरेका छन्।
एमाले स्रोतका अनुसार अहिले नेपाल पक्षमा भएका नेता मध्ये सुरेन्द्र पाण्डे महासचिवका सम्भावित उम्मेदवार हुन्। रावल उपाध्यक्ष उठ्न् निश्चित जस्तै छ।
भुषाल, विष्टहरु सचिवको सम्भाव्य उम्मेदवार भएको दावी स्रोतले गरेको छ। नेपालले उपयुक्त समयम पुरै प्यानल सहित औपचारिक उम्मेदवारी घोषणा गर्ने बताएका छन्।
स्रोतका अनुसार नेपाल प्यानलले ओलीतिरबाट महासचिव इश्वर पोखरेल वा सचिव विष्णु पौडेललाई तान्ने प्रयास गरिरहेको छ। ओलीबाट यी मध्ये एकले महासचिव उम्मेदवार पाउने र अर्कोलाई यताबाट महासचिव उम्मेदवार दिन सकिने
विकल्पमा पनि छलफल चलिरहेको छ।
पत्रकारहरुसँग एमाले अध्यक्षका अर्का प्रत्यासी केपी शर्मा ओलीको नाम नलिइकन नेपालले त्यो समूहलाई प्रहार गरेका छन्।
'केहिले एमालेलाई प्राइभेट कम्पनी जस्तो बनाउने योजना बुनेका छन्,' नेपालले भने, 'पाण्डबको पाँच भाईले भागवण्डा गरे जसरि पार्टी चल्दैन।'
ओली–उपाध्यक्ष वामदेव गौतमको गठबन्धनको सांकेतिक आलोचना गर्दै नेपालले भने, 'म पछि फलानो, एक वर्षमा फलानो, त्यसपछि फलानो भनेर तोक्ने एमाले प्राइभेट लिमिटेड कम्पनी हो र?'
एमाले 'डनवाद' र 'धनवाद'को बादल मडारिएको बेला आफ्नो उम्मेदवारी यस्तो प्रवृत्ति अन्त्यको लागि पनि भएको नेपालले बताए।
नेपालले अर्को पक्ष जनताको बहुदलीय जनवाद (जबज)को असली प्रवक्ता देखिन चाहेको भन्दै त्यसको सैद्वान्तिक खण्डन गरे।
'मदन सिद्वान्त जीवनका लागि हो, जीवन सिद्वन्तका लागि होइन भन्नुहुन्थ्यो,' नेपालले भने, 'कतिपयले जबजलाई खोपीको देउता वा निर्जीव सिद्वान्त बनाउन खोजेका छन्।'
जबज अकाशबाट झरेर आएको होइन भन्दै नेपालले त्यसमा आफ्नो अपनत्वको दावी गरे। 'जबजको विकासको क्रममा कसले भूमिका खेले,' उनले आफै उत्तर दिए, 'हामी नै हो।'
पार्टीको अनुदारवादी धारले एमाओवादीसँग चुनावी तालमले गर्न नदिएर २०६४ को निर्वाचनम तेत्तिस सिटमा खुम्चिनुपरेको विश्लेषण नेपालले सुनाए।
'मैले प्रचण्डलाई काठमाडौंमा एक सिट दिउँ भन्दा उपत्यकाको १५ सिटमा हुन्न सोह्रौंमा दिऊ भनेर साथिहरुले प्रतिवाद गरे,' नेपालले भने, 'पार्टीले चुनाव हार्दा नैतिक जिम्मा लिएर माधव नेपालले मात्र छाड्यो। अरुले छाड्ने हिम्मत गरेनन्। नैतिक जिम्मेवारी पनि लिएनन्। '
एमाले नेता पाण्डेले माले नेता कार्यकर्ताको आर्थिक जीवन पारदर्शी हुनुपर्छ। कति कमाए र कर तिरे समाजलाई भन्न सक्नुपर्छ।
'नेपाललाई देश विदेशको प्रभावबाट अलग राख्नुपर्छ,' उनले भने, 'एमाले चरित्रको हिसाबले समर्पित र लोकतान्त्रिक।'
एमालेलाई असल इमान्दार परिवर्तन चाहने नेताको अनुशासित पार्टी बनाउन चाहेको पाण्डेले बताए।
एमाले असलहरुको प्रतिनिधित्व गर्ने 'असल पार्टी' बन्न चाहन्छ।