दोलखामा रहेका काष्ठ उद्योगहरुमा अवैध काठ प्रयोग गरिएको आरोपमा पाँच जना भेनियर व्यवसायी पक्राउ परेका छन । पक्राउ पर्नेहरुमा भीमेश्वर नगरपालिकाको मकैबारीमा सञ्चालित दिव्य सःमिलका शिवबहादुर शिवाकोटी, शैलुङ्गेश्वरमा सञ्चालित सेतीदेवी भेनियरका शिवबहादुर कार्की, काब्रेमा सञ्चालित हनुमन्तेश्वर सःमिलका अर्जुन दाहाल, काब्रेकै मैनापोखरी सःमिलका उद्धव दाहाल र ठूलोपातलमा सञ्चालित दोलखा सःमिलका टेकबहादुर तमाङ रहेका छन ।
पक्राउ परेकाहरुलाई जिल्ला प्रहरी कार्यालयमा राखिएको प्रहरी नायव उपरिक्षक सुरेशप्रसाद काफ्लेले जानकारी दिए । उनीहरुलाई शुक्रबार पक्राउ गरिएको हो ।
जिल्लाका विभिन्न क्षेत्रमा सञ्चालित भेनियर र सःमिल उद्योगहरुले अवैध काठको प्रयोग गरेको अख्तियारको छानविनमा फेला परेपछि थप अनुसन्धानका सञ्चालकहरुलाई पक्राउ गरिएको जिल्ल वन कार्यालय दोलखाका प्रमूख रविन्द्र महर्जनले जानकारी दिए । जिल्लामा वनफडाँनीका बारेमा गुनासो बढ्न थालेपछि अख्तियार दुरुपयोग आयोगको अनुसन्धान टोलीले दोलखा आएर दुई हप्ता अघि केही उद्योगहरुमा छापा मारेको थियो । अख्तियारसँगै प्रधानमन्त्री तथा मन्त्रीपरिषद् कार्यालयका सचिव कृष्णहरि बास्कोटाको टोलीले समेत जिल्लामा स्थलगत अनुगमन गरेको थियो ।
जिल्ला वन कार्यालय दोलखाका प्रमुख महर्जनका अनुसार जिल्ला वन कार्यालयले समेत सहायक वन अधिकृतहरु चन्द्रबहादुर थापा, मुकुन्दप्रसाद अधिकारी र गोविन्दप्रसाद दाहाललाई अनुसन्धान अधिकृत तोकी अनुसन्धान अघि बढाएको छ । दोलखामा एक प्लाई उद्योग सहित ८ वटा भेनियर सञ्चालित छन् । अख्तियारले उक्त भेनियर र समिलहरुमा टाँचा नलगाइएको अबैध काठहरु प्रयोग गरेको निष्कर्ष निकालेपछि उनीहरु पक्राऊ परेका हुन् ।