नेपालका यु १६ राष्ट्रिय टोलीका कप्तान तथा युवा स्ट्राइकर बिमल घर्तिमगरको गोलको मद्दतले बेल्जियमको एन्डरलेच्ट क्लब यू-१७ फ्यूचर कपको सेमिफाइनल पुगेको छ।
उनले आइतबार भएको खेलमा फ्यूचर कपको क्वाटर फाइनलमा फिनरबाचेविरुद्ध गोल गरेका हुन् । एन्डरलेच्टले फिनरबाचेलार्इ २-० ले पराजित गरेको हो।
ट्रायलका लागि युरोप पुगेका घर्तीमगरले शनिबार एसी मिलानको यु–१७ टोलीविरुद्ध अन्तिम ११ मिनेट खेलेका थिए।
खेलको पहिलो हाफको ९ मिनेटमा विमलले एन्डरलेच्टका लागि गोल गरेका थिए । यस्तै एन्डरलेच्टले गरेको दोस्रो गोलमा पनि उनले प्रहार गरेको कर्नर बललार्इ सदुपयोग गर्दै माटारेजले गोल गर्दै सेमीफाइनल यात्रा तय गरेको थियो
६० मिनेटको खेलमा उत्रेका विमलले पुरै समय खेलेका थिए । उनले खेलअवधिभर आफ्नो प्रभाव छोड्न सफल भएका थिए।
विमल दुर्इ महिने ट्रायलका लागि बेल्जियमको एन्डरलेच्ट क्लबमा गएका हुन् ।
तस्विर साभार गोलनेपाल