गुल्मीको दरबारदेबिस्थान गाविसमा जीप दुर्घटनामा मृत्यु हुनेको संख्या पाँच पुगेको छ।
आईतबार बिहान दरबारदेबिस्थान गाविसबाट सदरमुकाम तम्घास आउँदै गरेको लु १ ज २५२९ नम्बरको जीप दरवारदेविस्थान गाविस वडा नं. ८ वेलपोखरा भन्ने स्थानमा दुर्घटना हुँदा १ जनाको घटनास्थलमै र चार जनाको उपचारको लागि अस्पताल लैजाँदै गर्दा मृत्यु भएको हो।
दुर्घटनामा परी दरबारदेबिस्थान–८ का ३५ वर्षीय जीप धनी धनी महेन्द्र कुँवर, ५० वर्षकी जमुना खत्री, ८ बर्षका बालक बिवश थापा, वलोकट –८ अर्घाखाँचीकी सानु मिया र चन्द्रकला सिंजालीको ज्यान गएको जिल्ला प्रहरी कार्यालय गुल्मीका प्रहरी निरिक्षक निशान्त श्रीवास्तवले बताए।
बालक थापाको घटनास्थलमै मृत्यु भएको हो। दुर्घटनामा अरु १६ जना घाईते भएका छन्। घाईते मध्य १३ जनालाई लुम्बिनी मेडिकल कलेज प्रवास पाल्पामा रेफर गरिएको छ भने अरुको जिल्ला अस्पताल तम्घासमै उपचार भईरहेको छ।
अस्पतालका अनुसार पाल्पा रेफर गरिएकामध्ये ३ जनाको अवस्था गम्भिर रहेको छ। अधिकांश घाईतेहरुको टाउकोमा चोट लागेको छ। जीप गाडिधनी कुँवरले नै गाडि चलाएका थिए। उकालोमा व्रेक फेल भएर जीप सडकबाट करिव एक सय मिटर तल खसेर दुर्घटना भएको प्रहरीले जनाएको छ।
