रोयल्टी र जरिवानावापतको रकम नबुझाएका तथा नवीकरण नगरी अवैधरुपमा सञ्चालन भएका देशभरका क्यासिनो आजदेखि बन्द भएका छन्।
संस्कृति, पर्यटन तथा नागरिक उडड्यन मन्त्रालयले नवीकरणका लागि पटकपटक ताकेता गरी म्याद थप गर्दा पनि क्यासिनो सञ्चालकहरुले नवीकरण नगरेपछि हिजो शनिबार क्यासिनो बन्द गराउन गृह मन्त्रालयलाई पत्राचार गरेको थियो।
देशभरका पाँचतारे होटलमा सञ्चालन भइरहेका (काठमाडौँमा आठ र पोखरामा दुई गरी १० वटा) क्यासिनो बन्द हुँदा त्यसमा आबद्ध १० हजार भन्दाबढी कर्मचारी र आश्रित परिवार समस्यामा परेका छन्।
क्यासिनो सञ्चालक र ग्राहक नआएपनि क्यासिनोका कर्मचारीहरु भने आज नियमित झैँ कार्यालयमा पुगेर काम गरेका थिए।
नेपाल स्वतन्त्र होटल क्यासिनो तथा रेस्टुरेँन्ट मजदुर युनियनका सदस्य लक्ष्मण देवकोटाले ग्राहक र व्यवस्थापन पक्ष नआए पनि कर्मचारी तथा मजदुरले आज आ–आफ्नो काम गरिरहेको बताए ।
विभिन्न क्यासिनोले रोयल्टी र जरिवानावापत सरकारलाई रु एक अर्ब ६ करोड बुझाउन बाँकी रहेको छ।
मन्त्रालयका प्रवक्ता मोहनकृष्ण सापकोटाले विगत १० महिनादेखि रोयल्टी र जरिवाना तथा नवीकरण गराउन ताकेता गर्दा पनि व्यवसायीले अटेर गरेकाले क्यासिनो बन्द गर्न सरकार बाध्य भएको बताए।
पटकपटक तोकेको म्यादभित्र सञ्चालकले मन्त्रालयको आदेश अटेर गरेकाले गैरकानुनीरुपमा क्यासिनो सञ्चालन हुन नदिई तिनलाई बन्द गराउनेतर्फ आवश्यक कारबाही गर्न गृह मन्त्रालयलाई अनुरोध गरिएको उनले बताए ।
यता गृह मन्त्रालयले पर्यटन मन्त्रालयको पत्रअनुरुप अवैध ठहरिएका क्यासिनो बन्द गराउन आजै स्थानीय प्रशासनलाई निर्देशन दिइसकेको जनाएको छ। रासस