गत वैशाख ५ बिहान आधार शिविरमा पहिरो जाँदा आरोहण टोलीका १३ जनाले ज्यान गुमाएपछि सगरमाथा आरोहीका सहयोगीले यस वर्ष सगरमाथा आरोहण नगर्ने भएका छन् ।
सगरमाथा आधार शिविरमा भेला भएका करिब पाँच सय जना सहयोगीले सन् २०१४ लाई आरोहणमा कालो वर्षका रुपमा मनाउँदै आधार शिविर पुगेका सबैलाई फर्कन आह्वान गरेका समेत गरेका छन् ।
आफ्नो ज्यान जोखिममा पारेर भएपनि पर्यटकलाई आरोहणका बन्दोबस्त मिलाउँदा पनि सरकारले बेवास्ता गरेको भन्दै उनीहरुले यो वर्षलाई कालो वर्ष मनाउन लागेका हुन् ।
आधार शिविरमा तीनदिनसम्म बसेको सिनियर गाइड, आरोहण टोलीका नेता तथा सहयोगीहरुको बैठकले यस्तो निर्णय गरेको हो। यस्तै बैठकले सरकारसँग १२ बुँदे मागसमेत पेश गरेको छ।
उनीहरुको मागमा सम्पूर्ण आरोहीलाई पेन्सनको व्यवस्था गर्नुपर्ने, आरोहणका क्रममा मृत्यु हुनेका परिवारका बालबच्चालाई नि:शुल्क शिक्षाको व्यवस्था गर्नुपर्ने, आरोही सहयोगीको जीवन बिमा बढाएर २० लाख रुपैयाँ पुर्याउनुपर्नेलगायतका विभिन्न १२ बुँदे माग अघि सारेका छन्।
यसैबीच सगरमाथामा भर्याङ बनाउने कामको जिम्मा पाएको सगरमाथा पोलुसन कन्ट्रोल कमिटीले पनि सहयोगीहरुले सगरमाथा आरोहण नगर्ने निर्णय गरेको छ।
उनीहरुले सहयोगीबिना पनि सगरमाथा आरोहण असम्भव रहेको बताउँदै यो वर्ष सगरमाथामा सहयोगि नजाने बताएका हुन् । यस वर्ष एक नेपाली र ३० विदेशी दलका तीन सय ३४ जना आरोहीले सगरमाथा चढ्ने अनुमति लिएका छन् ।
यद्यपी आरोही सगरमाथा चढनेपनि आफूहरुको भर्याङ निर्माणको काम नरोकिने कमिटीले जनाएको छ । उक्त कमिटीले आठजना आइसफल डाक्टरमार्फत सगरमाथामा भर्याङ बनाउने काम गर्दै आएको छ । सहयोगीको निर्णयमा आइसफल डाक्टरले पनि सहमति जनाएका छन् । तर सरकारले यसका विषयमा भने यसको औपचारिक पुष्टि गरेको छैन् ।
