आफ्नै पार्टीभित्रबाटै कतिपय नेताहरुले सरकारको आलोचना गरेर जनता र कार्यकर्ता भाँड्ने काम गरिरहेको आरोप लगाउदै प्रधानमन्त्री एवं नेपाली कांग्रेस सभापति सुशील कोइराला उनीहरुसँग आक्रोसित छन्।
कांग्रेसको मेची–महाकाली जागरण अभियान अन्तर्गत कोसी अञ्चलस्तरीय कार्यकर्ता प्रशिक्षण कार्यक्रमको उद्घाटन गर्न पार्टीका शिर्ष नेता, केन्द्रीय सदस्यहरु र सभासदसहित विराटनगर आइपुगेका कोइरालाले सोमबार ‘सरकार तरबारको धारमा हिँडिरहेको भन्ने नबुझेको’ भन्दै नेताहरूको चर्को आलोचना गरे।
‘सरकारले यो काम गरेन, त्यो गरेन, यो भएन र त्यो भएन भनि कति सरकारको मात्रै आलोचना गर्नुहुन्छ तपाईंहरु?,’ कोइरालाले भने, ‘थाहा छैन कुन तरबारको धारबाट हिँड्नु परिरहेको छ सरकारलाई?’
तीन दिन लामो प्रशिक्षण उद्घाटनमा झन्डै पच्चीस मिनेट बोलेका कोइरालाले आफ्नो भाषणको पूरै समय नेताहरूको आलोचनामा खर्चेका थिए।
माओवादीलाई जंगलबाट ल्याएर शान्ति प्रक्रिया हुँदै अहिलेको ठाउँसम्म ल्याउँदा संसारले नेपाल अब हत्या, हिंसा र आतंकबाट मुक्त भयो भनेर प्रशंसा गरिरहेका बेला पार्टी संगठन र नेताहरूले नबुझेको भन्दै कोइरालाले चिन्ता व्यक्त गरे।
मुलुकमा शान्ति, स्थायित्व र लोकतान्त्रिक संविधान आवश्यक छ भन्ने कुरा समेत नेताहरूले नबुुझेको कोइरालाले बताए। ‘साठी वर्षभन्दा बढी भो नेपाली कांग्रेसले संघर्ष गरेको, तपाईंहरुले के बुझ्नुभएको छ?,’ उनले पश्न गर्दै भने, ‘त्यतिकै यहाँ आएर मान्छे भड्काइदियो, एउटा हुन्छ नि त!’
उद्घाटन सत्रमा बोल्ने नेताहरूले पार्टीमा गुटबन्दी हावी भएको, सरकार समावेशी नभएको, सुस्त देखिएको भन्दै आलोचना गरेका थिए।
उनीहरुविरुद्ध चर्को जवाफ फर्काउँदै कोइरालाले जहिले पनि गुटबन्दी र भागबन्डाको कुरा गरेर जनतालाई निराश पार्ने काम भइरहेको बताए। ‘जहिले पनि भागबन्डा मिलेन, एकता भएन भनेर भन्यो, किन भएन एकता? यहाँ उठाउनुप¥या’े, कोइरालाले भने, ‘कहाँबाट गल्ती भएको हो? मैले गरेको गल्ती केही छ भने मलाई सजाय दिनुहोस्।’
कोइरालाले आफू पार्टी सभापति भएपछि कसलाई कति न्याय र अन्याय गरेको छ भन्ने कुरा देखाउनु चुनौती समेत दिए। ‘म सभापति भएपछि के अन्याय गरेको छु र खालि जस्टिस र इन्जस्टिसको कुरा उठाइरहनुुहुन्छ?’ उनले भने, ‘कसले गरेको छ गुटबन्दी? यहाँ भन्न र बोल्न सक्नुहुन्छ? मौका आउँदा बोल्न नसक्ने अनि गएर कार्यकर्ता भाँड्ने?’
संविधानसभा निर्वाचनपछि वातावरण बन्दै गएकोले विदेशीहरु नेपालमा लगानी गर्न लालायित भइरहेको स्थितिमा सरकारको आलोचना गरेर बढी लोकप्रिय बन्ने काम भइरहेको उनले बताए। सरकारमा सबैलाई मिलाएर लानु चुनौतीको विषय रहेको भन्दै अक्रोषित मुद्रामा भनेर्, सरकार चलाउनु जादु गरेजस्तो हो र म खुलजा सिमसिमजस्तो हो?’
कोइरालाले एक वर्ष समय पर्खिने धैर्यता राख्न नेताहरुलाई सुझाव दिए। ‘एक वर्ष समय दिनुहोस् हुन्छ कि हुँदैन म देखाउँछु, म असफल भएँ भने निकाल्दिनुस् मलाई,’ कोइरालाले भने, ‘पार्टीमा भाँडभैलो गरेर, गुटबन्दी गरेर, भागबन्डामा अल्झिरहने?’ शान्तिमा खलल पुगे नेपालको अस्तित्व नरहने भन्दै कोइरालाले सचेत हुन सबैलाई अनुरोध गरे।
पार्टीमा एकता भएको भए कांग्रेसले चुनावमा दुई तिहाई सिट ल्याउने थियो भन्दै कोइरालाले अनुशासन उल्लंघन गरेको उजुरीको खात आफूसँग भएको बताए । ‘उसले उसलाई हराउने, उसले उसलाई घात गरेको उजुरीको खात मसँग छ,’ उनले भने, ‘जनताले विश्वास गरेकाछन्, त्यो बचाउनुपर्छ, गाउँले जनताले भरोसा गरेका छन्, जनतालाई राम्रो सन्देश दिनुपर्दैन?’
उनले एकवर्षभित्र संविधान आउने कुरामा ढुक्क हुन आग्रह गरे । सुशासन सरकारको प्राथमिकतामा रहेको भन्दै भ्रष्टाचारमुक्त समाज निर्माण गर्नु आफ्नो सरकारको दायित्व भएको कोइरालाले बताए । ‘भ्रष्टाचार गर्ने जोसुकै होस् छाडिँदैन,’ उनले भने, ‘सुशासन नहुँदा जनता निराश छन्।’
उनले सरकार स्थानीय निकायको निर्वाचन गराउन लागिपरेको बताए। स्थानीय चुनाव नहुँदा विकासमा असर परेको र भ्रष्टाचार मौलाएर गएको प्रधानमन्त्रीले बताए।
कांग्रेस उपसभापति रामचन्द्र पौडेल, महामन्त्री कृष्ण सिटौला, नेताहरु अर्जुननरसिंह केसी, मन्त्रीहरु बिमलेन्द्र निधी, मिनेन्द्र रिजाल, एनपी साउद, केन्द्रीय सदस्यहरु शेखर कोइराला, सुजाता कोइराला, नवीनराज जोशी लगायत दर्जनबढी केन्द्रीय नेता तथा सभासद् प्रशिक्षण उद्घानमा सहभागी थिए । मेची अञ्चलस्तरीय प्रशिक्षण सकेर आइतबार साँझ कोइराला विराटनगर आइपुगेका हुन् । उनी सोमबारै काठमाडौं फर्किसकेका छन्।