नेकपा एमालेको नजिकिँदै गएको महाधिवेशनसँग पार्टीको आगामी कार्यदिशाको विषयमा चर्को बहस शुरू भएको छ।
महाधिवेशनमा पार्टीलाई अगाडि बढाउनका लागि नेतृत्व परिवर्तनदेखि लिएर जनताको बहुदलीय जनवादलाई समेत समयअनुसार रूपान्तरण गरेर लैजानुपर्ने बहस शुरू भएको हो। महाधिवेशन नजिकिँदै जाँदा नेताहरू आ–आफ्नो विचार र धारणाहरू सार्वजनिक गर्दै नेतृत्वका लागि दौडधुपमा लागेका छन्।
राजधानीमा मंगलबार नेपाल कम्युनिस्ट पार्टीको स्थापना दिवसका अवसरमा मदनभण्डारी फाउन्डेसनद्वारा आयोजित विचार गोष्ठीमा एमालेका शीर्ष नेताहरूले पार्टीको कार्यदिशालाई सुदृढीकरण गरेर लैजानुपर्नेमा जोड दिएका छन्। कार्यदिशालाई सुदृढीकरण गरेर लैजाने विषयमा नेताहरू सहमत भए पनि नेतृत्वमा भने आ–आफ्नो दाबी गरे।
अध्यक्ष झलनाथ खनालले नवौं महाधिवेशनलाई एकता र सहमतिको महाधिवेशन बनाइने बताए ।
‘वैचारिक, सैद्धान्तिक र नीतिगत रूपमा गम्भीर छलफल गर्नुपर्छ’, अध्यक्ष खनालले भने– ‘अब पार्टीलाई अगाडि बढाउनका लागि नेताहरूबीच बहस हुनुपर्छ।’ पार्टीभित्र हुने बहसले सीमा नाघ्ने गरेको स्मरण गराउँदै उनले नीति र सिद्धान्तको सीमाभित्र रहेर पार्टीलाई एकढिक्का बनाउने बहसको खाँचो रहेको औंल्याएका थिए । उनले नेपाली समाज पुँजीवादको प्रारम्भिक चरणमा रहेको बताए ।
वरिष्ठ नेता माधवकुमार नेपालले पार्टीभित्र आरोप–प्रत्यारोपभन्दा पनि पार्टी निर्माण गर्नका लागि बहस गर्नुपर्ने बताए । जनताको बहुदलीय जनवाद एकाएक फुत्त बाहिर नआएको उल्लेख गर्दै नेता नेपालले जबजलाई अहिलेको समयअनुसार व्यापक छलफल गरेर अगाडि बढ्नुपर्नेमा जोड दिएका थिए । ‘सिद्धान्तसँग व्यवहार अगाडि बढेन भने काम छैन’, उनले भने– ‘परिवर्तनलाई व्यवहारमा समृद्ध बनाउनुपर्छ, सिद्धान्तमा परिवर्तन गर्नुपर्छ।’
६२⁄०६३ सालको क्रान्तिमार्फत राजनीतिक क्रान्ति सम्पन्न भएको उल्लेख गर्दै उनले भने– ‘गणतन्त्र प्राप्तिको आन्दोलनका अगुवाइ एमालेले गरेको हो यसको एक भारी तथ्यांक पेस गर्न पार्टी तयार छ।’ नेपाली समाज अब अर्धसामन्ती र अर्धउपनिवेश नभएको बताउँदै नेता नेपालले नवउपनिवेश सोच उग्र रहेको बताए । ‘पार्टीभित्र अराजनीतिक प्रवृत्ति छ्यापछ्याप्ती बढेको छ, हावादारी प्रवृत्ति पनि बढ्दै गएको छ’, उनले भने– ‘वैचारिक र संगठनात्मक आचरण र कार्यशैलीमा संघर्ष गर्दै पार्टीलाई क्रान्तिकारी पार्टी बनाउनुपर्छ।’ पार्टीलाई मूल प्रवाहको पार्टीका रूपमा स्थापित गरेर अगाडि बढ्नुपर्नेमा जोड दिँदै उनले पार्टीमा भागबण्डा गरी पालैपालो गर्ने र प्राइभेट लिमिटेड बनाउनुपर्छ भनेर रहर गर्दैमा नेतृत्व नपाइने स्पष्ट पारे।
उपाध्यक्ष वामदेव गौतमले अबको पार्टी अध्यक्ष संसदीय दलका नेता केपी शर्मा ओली हुनुपर्ने बताए । आफू पार्टी फुटाउन लागिपरेकाले अहिले अध्यक्षको दाबी नगरेको बताउँदै उनले नयाँ व्यक्ति अब पार्टी अध्यक्ष बन्नुपर्ने बताएका हुन् । पार्टीमा गतिअनुसारको नेतृत्व हस्तान्तरण गर्नुपर्नेमा जोड दिँदै उनले पार्टीमा सधैं एकै व्यक्ति नेतृत्वमा हुँदा गति नआउने बताए । आजको नेपाल समाचार पत्रमा खबर छ।
