काठमाडौं महानगरपालिकाले ७ वटा पाँचतारे होटल, पाँचवटा तारे र २३ वटा व्यापारिक कम्प्लेक्सलाई सात दिनभित्र कर तिर्न पत्राचार गरेको छ। होटलसहित सबै व्यापारिक संस्थाले कर नतिरे फोहोर संकलन बन्द गर्ने चेतावनी दिएको छ। आजको नेपाल समाचार पत्रमा खबर छ।
कामपाले सोमबार सार्वजनिक सूचना जारी गरी कर नतिर्ने होटल र व्यापारिक संस्थाको नामावली प्रकाशित गरेको छ। कामपा राजस्व विभाग योजना तथा अनुगमन महाशाखा प्रमुख ध्रुव काफ्लेले राजधानीमा सञ्चालिन अन्नपूर्णबाहेक सबै पाँचतारे होटलले महानगरपालिकालाई तिर्नुपर्ने कर नतिरेको जानकारी दिए ।उनले कर नतिर्नेलाई तोकिएको समयभित्र करको विवरण बुझाउन वा कर तिर्न नआए पहिलो चरणको कार्यक्रमअन्तर्गत फोहोर संकलन बन्द गरिने स्पष्ट पारे।
कामपाले सार्वजनीक गरेको पाँचतारे होटलहरूमा होटल सोल्टी, एभरेस्ट, याक एन्ड यती, सांग्रिला, मल्ललगायतका रहेका छन्। तीबाहेक रोयलसिङ्गे, होटल शंकर, माउन्टेन, ल्यान्डमार्क र मार्कोपोलो होटल पनि कर नतिर्ने सूचीमा रहेका छन्।
ती होटलले आर्थिक वर्ष ०५७⁄०५८ देखि हालसम्म कुनै पनि करको विवरण र रकम बुझाएका छैनन्। कामपा राजस्व विभाग कर संकलन महाशाखा प्रमुख महेश काफ्लेले ती होटल र व्यापारिक कम्प्लेक्सबाट करिब ५५ करोड रुपियाँबराबरको कर संकलन हुने दाबी गरे। उनले भने, ‘कर तिर्न पत्राचार गरेका छौं, एक सातापछि पनि विवरण बुझाउन नआए स्थानीय स्वायत्त शासन ऐनअन्तर्गत कारबाहीको पक्रिया अघि बढाउनेछौं।’
हाल सञ्चालनमा रहेका होटलले मजदुर आवास, सेडहरू त्था होटलको ग्राहक बस्ने खाने खास घरजग्गा, सवारीसाधनको पार्किङ स्थान र बगैंचाबाहेकका स्थानको कर लिने व्यवस्था छ। तर ती होटले आफ्नो नाममा रहेको घरजग्गा व्यापारिक प्रयोजनमा प्रयोग गर्दै आएपछि कामपाले आफ्नो अधिकार क्षेत्र प्रयोग गरी कर उठाउन थालेको हो।
यसअघि पटकपटक पत्राचार गर्दा पनि कर तिर्ने र विवरण बुझाउन अटेर गरेपछि सार्वजनीक सूचना जारी गरेको कामपाले जनाएको छ। कामपाले लामो समयदेखि कर नतिरेको जनाउँदै राजधानीमा सञ्चालित ठूला व्यापारिक कम्प्लेक्सलाई समेत पत्र पठाएको छ।