बैदेशिक रोजगारको शिलशिलामा १ वर्ष अगाडि कतार आएका कास्की जिल्ला चाउथेका ३८ वर्षीय वीरबहादुर थापाको सुतीरहेको अवस्थामा आफ्नै कोठामा ज्यान गएको छ।
मृतकको शवलाई सोहि दिन हमद हस्पिटल पुर्याईएको थियो। उनको हृदयघातबाट मृत्यु भएको हमद हस्पिटलले जनाएको छ।
आईतबार राती काम गरेर उनी साथीहरु सँगै सुतेका थिए, सोमबार बिहान काममा जानका लागि साथीले उठाउन खोज्दा केहि नबोलेपछी बिहान ३.३० बजे एम्बुलेन्स बोलाईएको थियो। डाक्टरले २ घन्टा अगाडि नै ज्यान गैसकेको जानकारी दिएको थापासँगै काम गर्ने चितवनका बाबुराम चौधरीले बताए।
बेलुका सँगै खाना खाएर बिहान समयमै उठाउने आग्रह गरेका थापाको मृत्युले छागाँबाट खसेको जस्तै भयो उनले भने।
मृतकका श्रीमती , २ छोरा र १ छोरी छन्। भर्खर ८ महिनाको तेस्रो सन्तानको मुख सम्म हेर्न नपाएका थापाको निधनले उनीसँगै काम गर्ने साथीहरु अझै पनी झस्कीरहेका छन। थापा अल एवल कम्पनीको चालकमा कार्यरत थिए।
शव नेपाल पठाउनका लागि प्रक्रिया अघि बढिसकेको छ। कतारस्थित नेपाली दूतावासको पहलमा शवलाई बुधवार सम्ममा नेपाल पठाईने मृतकका आफन्त प्रकाश श्रेष्ठले बताए। सहयोगका लागी कास्की आर्दश सेवा समाजका अध्यक्ष आशबहादुर गुरुङलाई पनि जानकारी गराईसकिएको छ।
कतारमा सुतीरहेको अवस्थामा निधन हुनुलाई साधारण हृदयघातबाट मृत्यु भएको भन्ने गरिन्छ। वर्षेनी अधिकाशं नेपालीहरुको सुतिरहेकै अवस्थामा निधन हुने गर्छ। कतारमा दुर्घटना र आकश्मिक निधनको वार्षीक रेसियो १ सय ७० देखी २ सय २५ जना रहेको पाईन्छ।
रोजगारीका लागि कतारमा ४ लाख भन्दा बढी नेपाली कार्यरत छन।
