संस्कृति पर्यटन तथा नागरिक उड्ययन मन्त्री भीमप्रसाद आचार्यले सरकारले बारम्बार अवसर दिँदा समेत अटेर गरि रोयल्टी नतिरी बन्द गर्ने सञ्चालकहरुबाट जसरी पनि बक्यौता रकम असुल गर्ने दाबी गरेका छन्।
रिपोर्टर्स क्लब नेपालले बुधवार आयोजना गरेको साक्षात्कारमा उनले एक साता भित्र बक्यौदा नबुझाउनेलाई कानूनी प्रक्रियाबाट सञ्चालकबाट असुल उपर गर्ने प्रक्रियाको सुरुवात गर्ने बताए।
साक्षात्कारमा मन्त्री आचार्यले सरकार क्यासिनो बन्द गर्ने सोचमा नरहेको स्पष्ट पार्दै पुराना सञ्चालकहरुले सूचारु नगरे नयाँ सञ्चालकहरुलाई सञ्चालनमा ल्याउन आब्हान गर्ने जानकारी दिए।
उनले भने– 'हामीले क्यासिनो बन्द गर्न खोजेका होईनौ, देश र मजदुरको पक्षमा यसलाई प्रक्रियामा लान खोजेका हौ। कसैले बन्द गरेर बचिन्छ भनेर सोचेको भए त्यो सम्भव छैन। सरकारले कानूनी प्रक्रियाबाट बक्यौदा असुल्छ। विधिमा आए अहिलेकै सञ्चालकलाई सञ्चालन गर्न दिन्छौ नभए नयाँ सञ्चालकलाई आब्हान गर्छौ।'
उनले अर्को एक प्रसंगमा सगरमाथा आरोहणको क्रममा दुर्घटनापछि ब्यवस्थित गर्न सधैको लागि नभई पाँच दिनको लागि मात्रै आरोहण बन्द गरेको जानकारी दिदै राष्ट्रको गौरबको रुपमा रहेको सगरमाथा आरोहण नरोकिने स्पष्ट पारे।
मन्त्री आचार्यले आरोहणको क्रममा पहिला तीन लाख रुपैया मात्र क्षतीपूर्ति पाउने गरेकोमा अहिले सरकारले पाँच लाख र विमाले १० लाख रुपैया क्षतीपूर्ति सहित आरोहरणको क्रममा मारिएकाको परिवारको शिक्षा र भरण पोषणको ब्यवस्था समेत सरकारले गर्ने बताए।
उनले पर्यटन बोर्डको रिक्त कार्यकारी निर्देशक छिट्टै नियूक्त गर्ने प्रतिबद्धता ब्यक्त गर्दै आवेदन गरेका १२ जना मध्येबाट नियूक्ती गरिने बताए। मन्त्री आचार्यले पर्यटन सम्बन्धी १९ संघ सस्थाहरुले निमित्त कार्यकारी निर्देशक सुवास निरौला विरुद्ध ज्ञापन बुझाएकोले प्रतिष्पर्घामा भए पनि उनी भने नियूक्त नहुने स्पष्ट पारे।
पार्टीको आगामी नवौ महाधिवेशनबाट वर्तमान अध्यक्ष झलनाथ खनालनै सर्वसम्मत रुपमा फेरि पनि अध्यक्ष बन्ने दाबी गर्दै पार्टीलाई संविधानसभाको निर्वाचनमा दोस्रो ठूलो पार्टी बनाउनुले पनि उहाँको नेतृत्वको अझै आवश्यकता रहेकोमा जोड दिए।
उनले भने–बरिष्ठ नेता माधवकुमार नेपाल र संसदीय दलका नेता केपी ओलीवीच प्रतिष्पर्घा छ। उहाँहरुवीच सहमति हुन नसके खनालनै सर्वसम्मत अध्यक्ष बन्नु हुन्छ।