सर्वोच्च अदालतको स्थायी न्यायाधीशका लागि न्याय परिषद्को सिफारिसमा नपरेका पुनरावेदन अदालत जुम्लाका मुख्य न्यायाधीश एकराज आचार्यले आज राजिनामा दिएका छन् ।
राजिनामापत्रमा उनले परिषद्ले पक्षपात, अन्याय र भेद्भावपूर्वक आफूबाहेकका सबै मुख्य न्यायाधीश र न्यायाधीशलाई सिफारिस गरी अन्याय गरेको, आफ्नो निष्ठाको उपेक्षा र अवमूल्यन गरेकाले तिनको मातहतमा रही काम गर्नु न्याय र अदालतप्रतिको अटल निष्टा, नैतिकता तथा धर्मविपरीत भएकाले राजिनामा दिएको उल्लेख गरेका छन् ।
परिषद्ले हिजो मुख्य न्यायाधीशमध्येबाट सर्वोच्चकै पूर्व अस्थायी न्यायाधीश भइसक्नुभएका पुनरावेदन अदालत हेटौँडाका वैद्यनाथ उपाध्याय, पुनरावेदन अदालत विराटनगरका गोपाल पराजुली, पुनरावेदन अदालत सुर्खेतका दीपकराज जोशी, पुनरावेदन अदालत इलामका गोविन्दकुमार उपाध्याय, पुनरावेदन अदालत राजविराजका ओप्रकाश मिश्र, पुनरावेदन अदालत महेन्द्रनगरका देवेन्द्रगोपाल श्रेष्ठ तथा पुनरावेदन अदालत बुटवलका कामु मुख्य न्यायाधीश चोलेन्द्रशम्शेर जवरा र पुनरावेदन अदालत हेटौँडाका कामु मुख्य न्यायाधीश जगदीश शर्मा पौडेललाई सर्वोच्चको स्थायी न्यायाधीशको लागि सिफारिस गरेको थियो।
मुख्य न्यायाधीशमध्ये वरिष्ठताको क्रममा छैठौ स्थानमा रहुेका उनी २०३७ सालमा न्याय सेवामा प्रवेश गरी २०३९ सालदेखि विभिन्न जिल्ला अदालत र पुनरावेदन अदालतको न्यायाधीश भइसकेका छन्।
उमेर हदका हिसावले सेवाबाट अवकास पाउन दुई दिन मात्र बाँकी रहेपनि मुख्य न्यायाधीश आचार्यले आजैबाट लागू हुने गरी राजिनामा दिएका हुन् । पुनरावेदन अदालतका न्यायाधीश ६३ वर्षसम्म र सर्वोच्च अदालतका न्यायाधीश ६५ वर्षसम्म आफ्नो पदमा बहाल रहनसक्ने संवैधानिक व्यवस्था छ। रासस