अपाङ्गता भएका व्यक्तिहरूलाई आफ्ना कार्यक्रमहरूमा कसरी सहभागी गराउन सकिन्छ भन्नेबारे डाक्टर, इन्जिनियर, आर्किटेक्ट, सामाजिक अभियानकर्ता, व्यापारिक केन्द्रका कर्मचारी, शिक्षक तथा बिध्यार्थी सहभागी भएको प्रशिक्षण कार्यक्रम सम्पन्न भएको छ। “सँगै हामी” नामक संस्थाले आयोजना गरेको कार्यक्रम अमेरिकी दूतावासको आर्थिक सहयोग र मासाचुसेट्स विश्वविद्यालयको प्राविधिक सहयोगमा भएको हो। कार्यक्रममा ३४ जना प्रशिक्षार्थी सहभागी थिए।
मासाचुसेट्स विश्वविद्यालयबाट आएकी पाउला सोट्निक र 'सँगै हामी'का अध्यक्ष सागर प्रसाईँले अपाङ्गता भएका मान्छे को हुन्, उनीहरूको विषयमा अन्तर्राष्ट्रिय कानुन कस्ता छन्, अपाङ्गमैत्री संरचना र कार्यक्रम भनेका कस्ता हुन् र उनीहरूलाई आफ्नो कार्यालय वा कार्यक्रमहरूमा सहभागी गराउन केके ध्यान दिनु जरुरी छ भन्ने विषयमा प्रशिक्षार्थीहरुलाई जानकारी गराएका थिए।
