आफ्नो रोजीरोटीप्रति प्रशासनले हस्तक्षेप गरी कुटपिट गरेको विरोधमा त्रिभुवन अन्तर्राष्ट्रिय विमानस्थलबाट चल्ने हरियो प्लेटका भाडाका सवारी साधनले बिहीबारदेखि सेवा बन्द गरेका छन्।
पीडित मजदुरहरुले बिहीबार विज्ञप्ति जारी गरी विमानस्थलमा सेवा बन्द रहने उल्लेख गरेका हुन्। उनीहरुले बुधबार भएको घटनामा दोषीहरुलाई कारबाही गरी व्यवसायको वातावरण सुनिश्चित गर्न माग गरेका छन्।
घटनाका विषयमा जानकारी दिँदै अखिल नेपाल यातायात मजदुर संघका अध्यक्ष जेबी कार्कीले ठूलो लगानी रहेको यो सेवालाई केही माफिया ध्वस्त बनाउन सक्रिय भएको आरोप लगाए।
हरियो प्लेटवाला भाडाका सवारी साधन चलाउने मजदूरहरुले जारी गरेको विज्ञप्तिअनुसार बुधबार दिउँसो कालो प्लेटका सवारी साधनका मजुदर र प्रहरीले उनीहरुमाथि आक्रमण गरेका थिए।