उपप्रधानमन्त्री तथा गृहमन्त्री वामदेव गौतमले नयाँ संविधान जारी नहुँदासम्म वर्तमान सरकार कायम रहने बताएका छन्।
स्थानीय निकाय कर्मचारी सङ्घको तेस्रो राष्ट्रिय परिषद्को आज उद्घाटन गर्दै उनले एक वर्षभित्र संविधान जारी गर्न सत्तापक्ष दल एकमत रहेकाले सरकारले त्यस कार्यमा पूर्णरुपमा सघाउने प्रतिवद्धता व्यक्त गरे ।
एक वर्षभित्र संविधान जारी गर्ने, स्थानीय निकायको निर्वाचन गर्ने र शान्ति प्रक्रियाका बाँकी काम पूरा गर्नु सरकारको मुख्य जिम्मेवारी भएको उल्लेख गर्दै गृहमन्त्री गौतमले सोहीअनुसार सरकारले आफ्ना क्रियाकलाप अघि बढाएको बताए।
कार्यक्रममा उनले स्थानीय विकास तथा सुशासनका क्षेत्रमा कलम चलाउने कारोबार दैनिकका पत्रकार रञ्जित तामाङलाई रु पाँच हजार नगदसहित सम्मान गरेका थिए।
सङ्घका अध्यक्ष हरिकुमार श्रेष्ठलगायतका कर्मचारीका अगुवाहरूले कर्मचारीको हकहितमा काम गर्ने प्रतिवद्धता व्यक्त गरेका थिए । कार्यक्रममा सङ्घमा आबद्ध उत्कृष्ट कर्मचारीलाई सम्मान गरियो। रासस