संविधानसभाका विभिन्न पाँच समितिमा सभापतिका लागि उम्मेदवारी संविधानसभा सचिवालयमा दर्ता भएको छ।
संविधानसभा सचिवालयको पूर्वनिर्धारित कार्यक्रमअनुसार शुक्रबार हुने भनिएको समितिको निर्वाचनका लागि आज उम्मेदवारी दर्ता कार्यक्रम सार्वजनिक गरिएको थियो।
सोअनुसार संविधान मस्यौदा समितिमा नेपाली काँग्रेसका महामन्त्री कृष्णप्रसाद सिटौलाको उम्मेदवारी परेको छ। उहाँका प्रस्तावकमा भानुभक्त ढकाल र समर्थकमा गिरिराजमणि पोखरेल रहेका छन् ।
त्यस्तै संवैधानिक राजनीतिक संवाद सहमति समितिमा एनेकपा (माओवादी)का नेता डा बाबुराम भट्टराईको उम्मेदवारी परेको छ। उनका प्रस्तावकमा पूर्णबहादुर खड्का र समर्थकमा सुरेन्दप्रसाद पाण्डे रहेका छन् ।
उक्त समितिकै लागि रामकुमार राईको उम्मेदवारी पनि परेको छ। उनको प्रस्तावकमा हरिचरण शाह र समर्थकमा गोपाल दहित रहेका छन्।
यसैगरी संविधान अभिलेख तथा निर्क्योल समितिमा नेकपा (एमाले)का सचिव विष्णुप्रसाद पौडेलको उम्मेदवारी परेको छ। उनका प्रस्तावकमा बलबहादुर केसी र समर्थकमा हरिबोलप्रसाद गजुरेल रहेका छन्।
क्षमता अभिवृद्धि समितिमा मधेसी दलका तर्फबाट लक्ष्मीकुमारी चौधरीको उम्मेदवारी परेको छ। उनका प्रस्तावकमा बद्रीप्रसाद पाण्डे र समर्थकमा सन्तकुमार दरै र जयन्तीदेवी राई रहेका छन्।
नागरिक सम्बन्ध समितिमा साना दलहरूका तर्फबाट प्रमिला राणाको उम्मेदवारी परेको छ। उनका प्रस्तावकमा ममता गिरी र समर्थकमा चिनकाजी श्रेष्ठ रहेका छन् ।
उम्मेदवारी दर्तापछि सञ्चारकर्मीसँग संक्षिप्त प्रतिक्रिया दिँदै एनेकपा (माओवादी)का नेता डा भट्टराईले संविधानसभाभित्र र बाहिर रहेका सबै राजनीतिक दललाई सहमतिमा ल्याएर संविधान निर्माण गर्नेतर्फ आफ्नो सक्रिय प्रयास रहने जानकारी गराए ।
उनले समितिको सभापतिको उम्मेदवारीका सन्दर्भमा प्रमुख दलहरूले एक अर्का दलका प्रस्तावक तथा समर्थक राखेर एकताबद्धरुपमा उम्मेदवारी दर्ता गरेको उल्लेख गरे ।
नेपाली काँग्रेसका महामन्त्री सिटौलाले सवै दलहरूको एकताबद्ध प्रयासबाट माघको पहिलो सातामा संविधान जारी गरिने बताए ।
उनले संविधानका सम्बन्धमा उत्पन्न विवाद दलहरूबीच सहमति कायम गर्दै समाधान गरिने र राज्यको मुख्य एजेण्डाका रुपमा रहेको संविधान निर्माणलाई निष्कर्षमा पुर्याइने बताए ।
