उपप्रधान तथा गृहमन्त्री वामदेव गौतमले गम्भीर मानवअधिकार हनन् तथा अपराधका दोषीलाई माफी दिन नहुने बताएका छन् ।
द्वन्द्वकालमा तत्कालीन माओवादीबाट अपहरणपछि हत्या गरिएका शिक्षक गुरुप्रसाद लुईंटेलको सालिक आज रामपुरमा अनावरण गर्दै उनले विधेयकमा कतै पनि आममाफीको प्रावधान नरहेको दाबी गरे ।
बेपत्ता छानविन, सत्यनिरुपण तथा मेलमिलाप आयोगको विधेयकका विषयमा अनावश्यक विरोध भएको भन्दै मन्त्री गौतमले मानवअधिकार हनन् र गम्भीर अपराधी करार व्यक्तिलाई माफी दिनै नसकिने बताए ।
उनले भने,'गम्भीर मानवअधिकार हनन् तथा अपराधमा क्षमा हुनै सक्दैन, विधेयकमा आम माफीको परिकल्पना पनि गरिएको छैन। अब बन्ने आयोगले द्वन्द्वकालका सबै घटनाको छानविन गर्नेछ।'
आयोग स्वतन्त्र हुने भएकाले तत्कालीन राज्य तथा विद्रोही पक्ष जो कोहीले गम्भीर अपराध गरेको ठहरे त्यस पक्षलाई क्षमा नदिइने र कानुनी कठघरामा उभ्याइने उनको भनाइ थियो।
एक फरक प्रसङ्गमा उहाँँले नेकपा एमालेको नवौं महाधिवेशन एकताको महाधिवेशन हुने र त्यसमा सर्वसम्मत नेतृत्व चयन हुने दाबी गरे । रासस