एमाओवादीको राष्ट्रिय सम्मेलन हुन एक साता मात्र बाँकी छ । तर नेतृत्वमा टक्कर दिँदै आएका नेताद्वय बाबुराम भट्टराई र नारायणकाजी श्रेष्ठ चुपचाप छन् । भट्टराई एउटै जिल्ला सम्मेलनमा पुगेका छैनन् भने श्रेष्ठ कास्की र ललितपुरको जिल्ला सम्मेलनमा मात्र सहभागी भए। आजको कान्तिपुरमा खबर छ।
वैचारिक रूपमा स्पष्ट नभई सम्मेलनले मात्र पार्टी बन्न नसक्ने तर्क गर्दै भट्टराईले त्यसलाई खासै महत्त्व नदिएको स्रोतले बतायो । 'विचारबिनाको संगठन बनाउन सम्मेलन गर्ने कुरा हुँदै छ,' भट्टराई निकट स्रोतले भन्यो, 'पहिले विचार समृद्ध गराउनुपथ्र्यो, अनि मात्र संगठन बन्थ्यो ।'
दाहालले वैचारिक बहस नगरी पेलेर राष्ट्रिय सम्मेलन गर्न लागेका आरोप लगाउँदै भट्टराईले 'नाम मात्रको सांगठनिक राष्ट्रिय सम्मेलनको खास अर्थ नहुने' बताउन थालेका छन् । पुरानै विचार लिएर गर्ने सम्मेलनले नेता तथा कार्यकर्तामा उत्साह नथप्ने भट्टराईको तर्क छ । भट्टराई राष्ट्रिय सम्मेलनभन्दा विशेष महाधिवेशनको पक्षमा थिए । 'नयाँ शक्ति' निर्माणको बहस ल्याएका भट्टराई सम्मेलन आउन एक साता मात्र बाँकी रहँदा सबै पक्षको उत्साह नदेखिनुको कारण खोज्नुपर्ने बताउन थालेका छन् । उनले संस्थापन पक्ष 'शक्तिको बलमा सम्मेलन टुंग्याएर' नयाँ वैचारिक बहसलाई थान्को लगाउने बाटोमा अघि बढेको निकट नेताहरूसँग भन्न थालेका छन् । 'नयाँ विचारबिनाको पार्टी खोक्रो हुन्छ' भट्टराई निकट एक नेताले सुनाए ।
श्रेष्ठ पनि संस्थापन पक्षको कार्यशैलीका कारण असन्तुष्ट छन् । आफूले उठाउँदै आएको राष्ट्रिय स्वाधीनताको मुद्दालाई संस्थापन पक्षले गम्भीर रूपमा नलिएको उनको आरोप छ । संस्थापनको कार्यशैलीलाई व्यंग्य गर्न उनी सार्वजनिक यातायात चढ्न थालेका छन् । संस्थापन पक्षले यसलाई 'पद र सुविधा' को बार्गेनिङ गरेको आरोप लगाएको छ । राष्ट्रिय सम्मेलनको मुखमा श्रेष्ठले कार्यकर्ताको मन जित्न यस्तो जीवनशैली अपनाएको संस्थापनको भनाइ छ ।