चीनबाट शनिबार नेपाल ल्याउन लागिएको एमए ६० जहाज कालोसूचीमा रहेको रहस्योद्घाटन भएको छ।
यसै कारणले उक्त जहाजले उडान अनुमति पाउन सकेको छैन। नेपाल नागरिक उड्डयन प्राधिकरणले उक्त जहाज उडानका लागि शुक्रबार साँझसम्ममा अनुमति नदिए सो जहाज शनिबार नेपाल ल्याउने कार्यक्रम स्वतः रद्ध हुने खबर आजको नेपाल समाचारपत्रमा छापिएको छ।
समाचारस्रोतका अनुसार शनिबार दिउँसो ३ बजे काठमाडौंमा अवतरण गर्नुपर्ने सो जहाज अनुमति नपाएपछि बेइजिङबाट उडे पनि चिनियाँ शहर कुङमिङमा थन्किएको छ। अन्तर्राष्ट्रिय नागरिक उड्डयन संगठन (आइकाओ) को मापदण्डअनुसार सो जहाज कम्पनी कालोसूचीमा परिसकेका कारण एयरक्राफ्ट अपरेटिङ सर्टिफिकेट (एओसी) दिन प्राधिकरणलाई अप्ठेरो परेको हो।
स्रोतका अनुसार एमाओवादी नेतृत्वको सरकारका पालामा निगमका कार्यकारी प्रमुख बनाइएका मनरूप शाहीले सो जहाज खरिद गर्ने तारतम्य मिलाउन गणेश ठाकुरलगायतका इन्जिनियरलाई चीन पठाएका थिए।
त्यसै गरी निगमका क्याप्टेनहरू विजय लामा र श्रवण रिजाललाई समेत सो बारेमा बुझ्न चीन पठाइएको थियो। उनीहरूलाई कम्पनीका तर्फबाट ज्वाइँलाई जस्तो सम्मान गरिएपछि उनीहरु प्रभावित भएर कालोसूचीको जहाज किन्न सिफारिस गरेको बुझिएको छ।
निगमका एक अधिकारीका अनुसार आइकाओको बैंककस्थित क्षेत्रीय कार्यालयका एक अधिकारीले केहीअघि नेपाल भ्रमणमा आएका बेलामा समेत प्राधिकरणका उच्च पदाधिकारीसँगको भेटमा सो जहाज र कम्पनीका बारेमा बताएका थिए। उनले कालोसूचीको जहाज नेपाल लग्न लागिएको भनेर आइकाओका मुख्यालयमा समेत पत्र पठाएको बुझिएको छ।
