एकीकृत नेकपा माओवादीका अध्यक्ष पुष्पकमल दाहालले विराटनगरमा सम्पन्न राष्ट्रिय सम्मेलनले पार्टीलाई पुनःनिर्माण एवम् सुदृढीकरण गर्न सहयोग पुगेको बताएका छन्। विराटनगरमा बुधबार बिहान सञ्चारकर्मीसँगको भेटघाटमा अध्यक्ष दाहालले सम्मेलनबाट पार्टीको दस्तावेज र विधान संशोधन एकमतले पारित हुनुले पार्टी बलियो भएको बताए ।
पार्टी सङ्गठनमा डा.बाबुराम भट्टराईबिना केन्द्रीय कार्य समिति अपूरो हुने भएकाले उनलाई चाँडै केन्द्रीय कार्य समितिमा सहभागी बनाउने अध्यक्ष दाहालले बताए।
अध्यक्ष दाहालले डा भट्टराईको सहमतिअनुसार केन्द्रीय सदस्य २६९ बाट १५१ बनाई हाल ९९ जना सदस्यको नाम प्रस्ताव गरेको जानकारीसमेत दिए ।
वरिष्ठ नेता डा भट्टराईलाई पाखा लगाउन नभई सशक्त जिम्मेवारी दिन आफू लागि परेकाले उनको रिक्तता केन्द्रीय कार्य समितिमा चाँडै पूर्ति हुने उनले बताए।
अध्यक्ष दाहालले पार्टीलाई सशक्त र नयाँ गति प्रदान गर्न आफू क्रियाशील भएर लागेकाले राजधानी फर्कने वित्तिकै डा भट्टराईसँग छलफल गरी उनीसहित अन्य नेताहरुलाई पनि केन्द्रीय कार्य समितिमा सहभागी बनाउने उल्लेख गरे।
एक प्रश्नको जवाफमा अध्यक्ष दाहालले नेकपा–माओवादीलगायत अन्य कम्युनिस्ट पार्टीलाई एकताबद्ध बनाउन आफूले पहल सुरु गरेको दाबी गरेका थिए।
एक वर्षभित्र मुलुकमा स्थायी शान्ति कायम गर्दै पहिचानसहितको संविधान निर्माण गर्न सबै वामपन्थी शक्ति र परिवर्तनकारी शक्तिबीच मोर्चा आवश्यक रहेकामा उनले जोड दिए। रासस
