टेलिफोनमार्फत् क्षेत्रीय सदस्यलाई गाली र धम्की दिएको भन्दै नेपाली काँग्रेस सुनसरी क्षेत्र नं. १ समितिले आफ्नै पार्टीका सभासद्लाई कारबाही गर्न माग गरेको छ।
समानुपातिक सभासद् एवं पार्टी केन्द्रीय सदस्य मीन विश्वकर्माले क्षेत्रीय सदस्य मुरारी भट्टराईलाई धम्की दिएको भन्दै क्षेत्रीय समितिले विधानअनुसार कडा कारबाहीको माग गरेको हो। जिल्ला, अञ्चल तथा केन्द्रीय समितिलाई पत्र लेख्दै कारबाही नभएसम्म विकको क्रियाशील सदस्यता नविकरण रोक्का गर्ने, बहिष्कार गर्ने र कारबाही नभए सामूहिक राजीनामा समेत दिने निर्णय गरेको छ।
गत वैशाख २० गते क्षेत्रीय समितिको बैठकमा विकको विषयमा दिएको अभिव्यक्ति स्थानीय पत्रिकामा छापिएपछि विकले आफूलाई धम्की दिएको भट्टराईले बताए। फोनमार्फत् विकले सुनसरीको बजेट अन्यत्रै लगिदिने र २०५४ सालमा धरानमा भएको काटाकाट र गोली हानाहानको स्थिति दोहोरिने चेतावनी दिएको भन्दै सदस्य भट्टराईले इलाका प्रहरी कार्यालय धरान र पार्टी क्षेत्रीय समितिमा आफ्नो जिऊ ज्यान माथि खतरा भएको भन्दै उजुरी दिएका थिए।
उजुरी परेपछि २३ गते धरानमा क्षेत्रीय समितिले आकस्मिक बैठक बसी विकलाई कारवाहीको माग गरेको हो। विकले एक साताअघि धरान आएर विभिन्न वडा समिति तथा पार्टीका भातृ संगठनहरुसँग आफूखुसी छलफल चलाएको आरोप लगाइएको छ। 'पार्टीको च्यानलबाट नआउँदा गुटबन्दी बढ्ने खतरा हुन्छ भनेर विरोध जनाएका थियौं,' भट्टराईले भने, 'मैले बोलेको कुरालाई लिएर धम्की दिइयो।' आफूहरुसँग सम्पर्क नै नराखी कार्यकर्ता र संगठनहरुलाई प्रशिक्षण दिइ गुटबन्दी गरेको आरोप क्षेत्रीय समितिले लगाएको छ। 'कार्यकर्ता भेटघाटको क्रममा देउवा पक्षको लबिङ गरेर शुशील पक्षलाइ होच्याउने तरिकाले अभिव्यक्ति दिए,' क्षेत्रीय समितिका एक पदाधिकारीले बताए। क्षेत्रीय समितिका पदाधिकारी तथा सदस्यहरुले २० गतेको बैठकमा विकको क्रियाकलापप्रति कडा आलोचना गरेका थिए।
गत संविधानसभाको दोस्रो निर्वाचनमा क्षेत्रले सिफारिस गरेको १६ जनाको सुचीमा नपरेका विकलाई जिल्लाले समावेश गरेर केन्द्र पठाएको थियो। क्षेत्रीय समितिको सिफारिसमा नपरेपछि विकले क्षेत्रीय समितिका तात्कालिन अध्यक्ष तथा संविधानसभा चुनावमा क्षेत्र नं. १ बाट प्रत्यक्ष तर्फका उम्मेदवार चन्द्रप्रसाद श्रेष्ठको विरुद्ध कार्यकर्ता परिचालन गरेको, उम्मेदवारको चरित्र हत्या गरेको ठम्याइ क्षेत्रीय समितिको छ। श्रेष्ठले विकविरुद्ध केन्द्रिय अनुशासन समितिमा उजुरीसमेत हालेको क्षेत्रीय समितिका एक जिम्मेवार पदाधिकारीले बताएका छन्।
यता विकले भने आफूले धरानमा विकासको ओइरो ल्याएकोले केही गुटको दास भएर बसेकाहरु आत्तिएको बताए। उनले कारवाही सिफारिसलाई केटाकेटीको खेल भन्दै आफूले नै धरानमा खानेपानी, सडक तथा बसपार्क सुधारसम्बन्धि योजनाहरु ल्याएको दावी गरे। 'म सभासद् भएर गएपछि क्षेत्रीय समितिले एक कल फोन पनि गरेको छैन,' विकले भने, 'म धरान जाँदा कार्यक्रम गरेर बोल्न लगाउँछन् अनावश्यक बोलेकै छैन।'
यता नेपाली काँग्रेस सुनसरी सभापती राजिव कोइरालाले भने अहिलेसम्म आधिकारीक रुपमा कारवाही सिफारिसको बारेमा जानकारी आइ नसकेको भन्दै मिडियामा हो हल्ला गर्नुभन्दा ठाउँमा कुरा राख्नुपर्ने बताएका छन्।
