सिफारिसमा परेका न्यायाधीशहरुको सुनुवाइ गर्न गठित संसदीय विशेष समितिले न्याय परिषद्, उजुरीकर्ता र सिफारिस समितिमा परेका न्यायाधीशहरुलाई बोलाएर छलफल गर्ने भएको छ।
संसदीय सुनुवाइ समितिको मंगलबारको बैठकले आइतबार पहिलो चरणमा न्याय परिषद्का सदस्यहरु डाकेर विवादास्पद छविका न्यायाधीशलाई सर्वोच्च अदालतमा सिफारिस गर्नुको कारण बुझ्नेछ।
बैठकले न्यायाधीश नियुक्तिको सिफारिसलाई गम्भीर रुपमा लिएर न्यायापरिषद्का सबैलाई बोलाउन निर्णय गरेको समितिका अध्यक्ष कुलबहादुर गुरुङले बताए । परिषद्ले त्रुटिपूर्ण र विवादास्पद व्यक्तिलाई सर्वोच्च अदालतको न्यायाधीशका लागि सिफारिस गरेकोमा आलोचना हुँदै आएको छ । प्रधानन्यायाधीश दामोदरप्रसाद शर्माको अध्यक्षतमा रहने न्यायपरिषद्मा कानुन मन्त्री नरहरि आचार्य, सर्वोच्चका वरिष्ठतम न्यायाधीश रामकुमार साह तथा दुई जना कानुनविद् क्रमशः खेमनारायण ढुंगाना र उपेन्द्रकेसरी न्यौपाने सदस्य छन् ।
अर्को चरणमा सिफारिसमा परेका न्यायाधीशहरुबिरुद्ध उजुरी गर्ने उजुरीकर्ताहरुलाई सुनुवाइ समितिमा बोलाइने छ।
न्याय परिषद्ले सर्वोच्च अदालतका लागि सिफारिस गरेका आठजना न्यायाधीशहरुमध्ये अधिकांश विवादास्पद फैसला गरेका र न्याय निरुपणमा बद्नामी कमाएकाहरु छन्।
