सांसद्हरुले कतिपय अर्न्तराष्ट्रिय गैरसरकारी संस्था (आइएनजीओ) हरुले कानून विपरित धर्मको प्रचारमा संलग्न भएको भन्दै त्यस्ता संस्थामाथि प्रतिबन्ध लगाउन माग गरेका छन्।
व्यवस्थापिका संसद्को महिला, बालबालिका, जेष्ठ नागरिक र समाजकल्याण समितिको मंगलबार सिंहदरबारमा बसेको बैठकमा सांसद्हरुले उपप्रधानमन्त्री तथा महिला, बालबालिका र समाजकल्याणमन्त्री सीपी मैनालीसामु कानून विपरितका गतिविधिमा संलग्न आइएनजीओमाथि प्रतिबन्ध लगाउन माग गरेका हुन्।
आइएनजीओहरुले समानान्तर सरकारको झल्को दिने गरी काम गरेको सांसद्हरुको भनाइ छ। उनीहरुले समाज कल्याण परिषद्ले प्रभावकारी अनुगमन गर्दा आइएनजीओहरुको मनोमानी बढेको भन्दै आफुखुसी गतिविधि गर्ने आइएनजीओमाथि प्रतिबन्ध लगाउन तथा अनुगमनमा बेवास्ता गर्ने परिषद्का कर्मचारीलाई कारवाहीको दायरामा ल्यायनुपर्ने बताए।
बैठकमा समितिका सदस्यहरुले आइएनजीओ तथा एनजीओका कामको रेखदेख गर्नुपर्ने समाज कल्याण परिषद् अझै पनि पञ्चायतकालीन शैलीबाट चलिरहेको बताए। उनीहरुले परिषद्को कामकारवाहीमा रुपान्तरण आवश्यक रहेकामा जोड दिए। अनुराधा थापामगर, श्रीमाया थकाली लगायतका सांसद्हरुले बेचविखनको शिकार हुने महिला र बालबालिकामध्ये अधिकांश विपन्न वर्गका भएको भन्दै विपन्न वर्गलाई रोजगारी र आयआर्जनका तालिम दिने कार्यक्रम तय गर्न उपप्रधानमन्त्री तथा महिला, बालबालिका र समाजकल्याणमन्त्री सीपी मैनालीको ध्यानाकर्षण गराए।
बैठकमा मन्त्री मैनालीले समाज कल्याण परिषद्मा धेरै बेथिति र बद्मासी रहेकैले आइएनजीओ तथा एनजीओहरुले आफुखुशी गर्ने अवसर पाएको भन्दै परिषद्को सुधारलाई आफूले प्राथमिकतामा राखेको बताए।
