नेपाली कांग्रेसका सभापति शेरबहादुर देउवाले संसदीय दलको विधानमा आवश्यक संशोधनका लागि आफू सधैँ तयार रहेको भन्दै यसबारे अनावश्यक विवाद र शंका नगर्न पार्टी नेता रामचन्द्र पौडेललाई आग्रह गरेका छन्।
मंगलबार टेलिफोन गरी सभापति देउवाले नेता पौडेललाई नयाँ संविधानको प्रावधानअनुसार आफू संसदीय दलको विधानमा संशोधनका लागि केन्द्रीय समिति र संसदीय दलको बैठक डाक्ने तयारीमा रहेको जानकारी गराएका थिए।
पौडेलसँगको कुराकानीका क्रममा सभापति देउवाले प्रमुख प्रतिपक्षी दलको नेताको चयन हुन नसक्दा संवैधानिक परिषद्को बैठक बस्न र संवैधानिक निकायमा महत्वपूर्ण नियुक्ति गर्न कठिनाई भइरहेको अवस्थामा दलको नेता तत्काल गर्नु परेको धारणा राखेका थिए।
संवैधानिक परिषद्को नियमावली अनुसार, प्रधानमन्त्री, प्रधानन्यायाधीश, सभामुख, राष्ट्रिय सभा अध्यक्ष, उपसभामुख र प्रमुख प्रतिपक्षी दलको नेतामध्ये बैठक संचालन गर्न कम्तिमा ५ जना र निर्णयका लागि ४ जनाको सहमति हुने व्यवस्था छ। तर राष्ट्रियसभा नभएको वर्तमान अवस्थामा प्रतिपक्षी दल कांग्रेस दलको नेता चयन हुन नसक्दा मंगलबारका लागि तय गरिएको संवैधानिक परिषदको बैठक देउवाकै आग्रहमा चैत २५ गतेका लागि तय गरिएको छ।
आफूले केन्द्रीय कार्यसमितिको पहिलो बैठकमा दलको नेता चयनका लागि निर्वाचन समिति गठन गर्नुपूर्व नै दलको विधान संशोधनबारे छलफल गरेको जानकारी पौडेललाई दिँदै त्यसका लागि चैत २२ गतेभित्र पार्टी केन्द्रीय कार्यसमिति र संसदीय दलको बैठक डाक्ने तयारीमा रहेको बताएका थिए।
पार्टीको १३औं महाधिवेशनबाट गठित नयाँ कार्यसमितिको पहिलो बैठकमा निर्वाचन समिति गठन गर्नुपूर्व प्रमुख नेताहरुसँगको छलफलमा कतिपय नेताहरुले नै चैत २० गते नेपाल बार एसोशियसनको अधिवेशन भएको कारण पार्टीका केही सांसद पनि त्यसमा सहभागी हुनु पर्ने भन्दै दलको नेता चैत २२ गतेभित्र गरिसक्ने मौखिक सहमति भएको थियो।
उक्त सहमतिका आधारमा सभापति देउवाले केन्द्रीय सदस्य रमेश रिजाल र सुरेन्द्र पाण्डेलाई आफ्नो तर्फबाट र गुरुराज घिमिरेलाई पौडेलको सिफारिसमा तीन सदस्यीय निर्वाचन समिति गठन गर्ने प्रस्ताव बैठकमा राखेका थिए।
उक्त समितिले चैत १४ गते बैठक बसी चैत २४ गते दलको नेता र २६ गते संसदीय कार्यसमितिको चयन गर्ने निर्णयसँगै दलको विधान संशोधन गर्न पार्टी केन्द्रीय समितिमा लेखि पठाउने निर्णय गरेको थियो।
तर देउवासँग सभापति पदमा पराजित पौडेल पक्षले विधान संशोधन नगरी दलको नेता चयनको मिति तय नगर्न र मिति तय गर्नुपूर्व सहमतिको आधारमा दलको नेता चयन गर्ने परम्परा अघि बढाउन माग गर्दै उक्त निर्णयमा लिखित असहमति जनाएका थिए।
त्यसलगत्तै पौडेलले आफू पक्षका केन्द्रीय सदस्य तथा सांसदहरुलाई आइतबार र सोमबार आफ्नो निवासमा डाकेर दलको नेता तथा संसदीय कार्यसमिति गठन गर्नु पूर्व विधान संशोधन गर्नुपर्ने माग सभापति देउवासँग गर्ने निर्णय गरेका थिए।
पौडेलको उक्त क्रियाकलापबाट सभापति देउवा पक्षले पार्टी भित्र दलको विधान संशोधनमा कुनै विवाद नभएको विषयमा पनि अनावश्यक प्रचारबाजी गरेपछि असन्तुष्ट बन्दै सभापति देउवाले पौडेललाई फोन गरेका थिए।