प्रधानमन्त्री केपी शर्मा ओलीले नेपाललाई भुपरिवेष्ठित तथा सानो मुलुक भनेर नहेप्न भारत र युरोपेली मुलुकहरुलाई चेतावनी दिएका छन्।
प्रधानमन्त्री ओलीले भारत र यरोपेली मुलुकहरुले सीमा नाघेर नेपालको संविधानका बारेमा वक्तव्यबाजी गरेको भन्दै जनसंख्या र भुगोलमा सानो तथा भुपरिवेष्ठित मुलुक भनेर नहेप्न भारत र युरोपेली मुलुकहरुलाई चेतावनी दिएका हुन्।
व्यवस्थापिका संसद् भवनमा विहिवार अपरान्ह बसेको पार्टीको संसदीय दलको बैठकमा निकै आक्रामक रुपमा प्रस्तुत भएका प्रधानमन्त्री ओलीले संविधानलाई दिगो र समावेशी बनाउनका लागि राजनीतिक विषयलाई सम्बोधन गर्न भारत र युरोपियन युनियनको सम्मेलनले दिएको सुझावलाई नेपालले निकै गम्भीरतापूर्वक लिएको बताए। उनले नेपालका बारेमा वक्तव्यबाजी गर्नुको साटो आफ्नै मुलुकका बारेमा चिन्ता गर्न भारत र युरोपेली मुलुकहरुलाई चेतावनी दिए।
प्रधानमन्त्री ओलीले भारत र युरोपियन युनियनको वक्तव्य सार्वभौम मुलुकको आत्मनिर्णय गर्न पाउने अधिकारमाथिको नाङ्गो हस्तक्षेप भएको बताए। उनले आफूलाई लोकतान्त्रिक भन्ने देशहरुले नेपाली जनताको सार्वभौमिकतालाई उपेक्षा गरी अर्ती उपदेश दिन नसुहाउने बताए।उनले वक्तव्यमा उल्लेख गरिएजस्तो संवैधानिक समस्या देखाउन भारत र युरोपेली मुलुकहरुलाई चुनौती दिए।
उनले संविधान मन नपराएको व्यक्तिलाई भेटेर सिंगो मुलुकको सार्वभौमिकतालाई नजरअन्दाज गरिनु अर्न्तराष्ट्रिय कानून र संयुक्त राष्टसंघको मान्यता विपरित भएको बताए।
बैठकमा करिब ४५ मिनेट मन्तव्य राखेका प्रधानमन्त्री ओलीले नेपालको संविधानका बारेमा कला प्रदर्शनीका बारेमा टिप्पणी गरेजसरी वक्तव्यबाजी नगर्न भारत र युरोपेली मुलुकहरुलाई चेतावनी दिए।
भारत र युरोपेली मुलुकहरुमाथि चर्को आक्रोश पोख्ने क्रममा प्रधानमन्त्री ओलीले राष्ट्रिय योजना आयोगका उपाध्यक्ष डा. युवराज खतिवडालाई पनि बैठकमा सहभागी गराएका थिए। आधाजसो सांसद् अनुपस्थित बैठकमा वरिष्ठ नेता झलनाथ खनाल र नेता माधवकुमार नेपाल पनि सहभागी थिएनन्।