दाङको डुरुवा गाविसको कार्यालयमा स्थानीयले बिहीबार ताला लगाएका छन्। नगरपालिका बनाउने प्रयासको विरोधमा उनीहरूले तालाबन्दी गरेका हुन्।
डुरुवालाई नगरपालिका बनाउन नहुने स्थानीयको माग छ। नेपाली कांग्रेस डूरुवा गाविसका इकाई सभापति शंकर खड्काका अनुसार जिल्ला विकास समितिले डुरुवा गाविसलाई समेटेर नयाँ नगरपालिका बनाउने बारेको परिपत्र गरेको थियो।
चैत ७ गतेको बैठकले हालसालै नगरपालिका नबनाउने निर्णय गरेर पठाएपनि जिल्ला विकास समितिमा बिहीवार बसेको बोर्ड बैठकले जिल्लामा थप चार वटा नगरपालिका थप्ने निर्णय गरेपछि डुरुवावासी आन्दोलित बनेका हुन्। सभापित खड्काले पूर्वाधार तयार नगरी तत्कालै नगरपालिका बनाउन हुन्न भन्ने माग रहेको बताए।
उनले स्थानीयको चाहनाविपरित आफूखुसी निर्णय गर्ने अधिकार जिविसलाई नभएको बताए। जिविसको निर्णय फिर्ता नभएसम्म ताला नखोल्ने स्थानीयले जानकारी दिए।
बिहीबार बसेको जिल्ला विकास समितिको बोर्ड बैठकले मध्यगढवा, राप्ती, बबई र हापुरे नगरपालिका लागि प्रस्ताव गरेको छ।
