प्रधानमन्त्री केपी शर्मा ओलीलाई चुनौती दिँदै सरकारी कर्मचारीहरुले सिंहदरबारभित्रै धर्ना र तालाबन्दी गरेका छन्।
प्रधानमन्त्री ओलीले केही महिना पहिले सामान्य प्रशासन मन्त्रालय पुगेर बन्द, हड्ताल र धर्नामा उत्रिने कर्मचारीलाई कारबाहीको चेतावनी दिएकामा सरकारी कर्मचारीले सोमबार अपरान्ह सामान्य प्रशासन मन्त्रालय अगाडि नै धर्ना गरेर निजामती कर्मचारीको आधिकारिक ट्रेड युनियनको निर्वाचनका लागि स्थापना गरिएको प्रमुख निर्वाचन अधिकृतको कार्यालयमा तालाबन्दी गरेका हुन्।
नेपाल राष्ट्रिय कर्मचारी संगठन, नेपाल मधेशी निजामती कर्मचारी मञ्च, नेपाल राष्ट्रसेवक कर्मचारी संगठन र राष्ट्रिय कर्मचारी संगठनले विभिन्न तीन बुँदे माग राखेर सिंहदरबारभित्रै धर्ना र तालाबन्दी गरेका हुन्। वैशाख १० गते तोकिएको आधिकारिक ट्रेडयुनियनको निर्वाचनका लागि प्रमुख दल सम्बद्ध कर्मचारीलाई मात्र निर्वाचन अधिकृत तोकिएको, थ्रेस होल्ड २० प्रतिशत तोकिएको तथा समानुपातिक र समावेशी चरित्रको निर्वाचन प्रणाली अवलम्बन गर्न नखोजिएको विरोधमा तालाबन्दी गरिएको राष्ट्रिय कर्मचारी संगठनका महासचिव प्रभात साहले बताए।
चारवटा कर्मचारी संगठनले तीन बुँदे माग सम्बोधन नभए वैशाख १० गतेको निर्वाचन विथोल्ने चेतावनी दिएका छन्। सरकारले निजामती कर्मचारीको आधिकारिक ट्रेडयुनियनको निर्वाचन चैत २८ गतेका लागि तोकिएकामा तयारी नपुगेको भन्दै वैशाख १० गतेका लागि सारेको छ।