राष्ट्रपति विद्यादेवी भण्डारीले संविधान जारी हुनु २०७२ सालको सर्वोच्च उपलब्धि भएको वताएकी छिन्।
नेपाली नयाँ वर्ष २०७३ सालको अबसरमा शुभकामना दिँदै भण्डारीले नेपालीको लामो समयदेखिको आफूलाई पूर्णरुपमा सार्वभौम बनाउने आकांक्षाको प्रतीक लोकतान्त्रिक गण्तन्त्र नेपालको संविधान जारी हुनु २०७२ सालको सर्वोच्च उपलब्धि भएको उल्लेख गरेकी छिन्।
उनले नयाँ वर्षको अबसरमा नेपाली दिदीबहिनी तथा दाजुभाईहरूमा नयाँ उत्साह र उमङ्गसहित सुख, शान्ति, सुस्वास्थ्य, दीर्घायु, सद्भाव, एकता, उत्तरोत्तर प्रगति एवम् समृद्धिका लागि शुभकामना व्यक्त पनि गरेकी छिन्।
उनले विनाशकारी भूकम्प र त्यसपछिको अत्यावश्यक वस्तुको आपूर्तिमा देखिएको अवरोध सामना गर्नुपर्दा २०७२ सालमा सम्पूर्ण नेपालीले ठूलो पीडा र सास्ती भोग्न बाध्य भएको राष्ट्रपति भण्डारीको सन्देशमा उल्लेख छ।
राष्ट्रपति भण्डारीले नयाँ संविधानको कार्यान्वयनबाट मुलुकलाई सङ्घीय संरचनामा रुपान्तरण गर्दै आर्थिक सामाजिक समृद्धितर्फको यात्रा अगाडि बढाउने जिम्मेवारी अहिले सबै नेपालीको काँधमा आएको पनि उल्लेख गरेकी छिन्।
नयाँ वर्षको आगमनसँगै मुलुक नयाँ सोच, शैली र गन्तव्यसहित अगाडि बढ्नुपर्ने बेला आएकाले सहमतिसहित राजनीतिक स्थिरता, नयाँ संविधानको कार्यान्वयन संवाद र सहमतिबाट हुनुपर्ने राष्ट्रपति भण्डारीले सन्देशमा उल्लेख गरेकी छिन्।
२०७२ साल ऐतिहासिकः उपराष्ट्रपति
उपराष्ट्रपति नन्दबहादुर पुनले पनि लोकतान्त्रिक विधि र पद्धतिमार्फत संविधानसभाबाट नयाँ संविधान जारी भएकाले वर्ष २०७२ ऐतिहासिक र महत्वपूर्ण वर्षको रुपमा रहेको उल्लेख गरेका छन्।
नयाँ वर्षको अवसरमा शुभकामना सन्देश जारी गरी उनले २०७३ सालमा नयाँ संविधानको कार्यान्वयन, भूकम्पपछिको पुनःनिर्माण र आर्थिक समाजिक रुपान्तरणसहितको समृद्धि, लोकतान्त्रिक गणतन्त्र संस्थागत र समानुपातिक समावेशी व्यवस्थाको व्यवहारिक कार्यान्वयन हुने विश्वास व्यक्त गरेका छन्।