गृहमन्त्री शक्ति बस्नेतले कालोबजारी नियन्त्रण गर्न मातहतका निकायलाई निर्देशन दिएका छन्। गृहमन्त्री बस्नेतले उपत्यका विशेष सुरक्षा सम्बन्धी शुक्रबार काठमाडौमा भएको गोष्ठीमा नाकाबन्दी हटेको दुई महिना नाघिसक्दा पनि आपूर्ति कम भएको वहानामा कालाबजारी भइरहेको भन्दै कालोबजारीमा संलग्नमाथि खरोरुपमा उत्रिन मातहतका निकायलाई निर्देशन दिएका छन्।
उनले नाकाबन्दीका बेला आपूर्ति असहज हुँदा जनताले धैर्यधारण गरेर राज्यलाई सहयोग गरेको राज्यले अब जनताप्रतिको आफ्नो जिम्मेवारी पूर्णरुपमा वहन गर्नुपर्ने बताए। उनले इन्धन लगायतका वस्तुको आपूर्ति व्यवस्थित र पारदर्शी तुल्याउने मामिलामा कुनै सम्झौता नगरी काम गर्न गृह मन्त्रालय मातहतका अधिकारीहरुलाई निर्देशन दिए।
गृहमन्त्री बस्नेतले संविधानको कार्यान्वयन सरकारको मुख्य प्राथमिकता भएको भन्दै यसमा आइपर्ने सुरक्षा चुनौतिप्रति सचेत भएर योजना बनाउन सुरक्षा निकायका प्रमुखहरुलाई निर्देशन दिए। सुरक्षा सम्बन्धी गोष्ठीमा गृहसचिव नारायणगोपाल मलेगो, मन्त्रालयका शान्ति सुरक्षा महाशाखा प्रमुख यादव कोइराला, नेपाल प्रहरी, सशस्त्र प्रहरी र राष्ट्रिय अनुसन्धान विभागका प्रमुख, उपत्यकाका तिनवटै जिल्लाका प्रमुख जिल्ला अधिकारी र प्रहरी प्रमुख सहभागी थिए ।
