काठमाडौंको कीर्तिपुर क्रिकेट मैदानमा भोलि हुने नेपाल र नामिवियाबीचको खेलमा नेपाल प्रहरीले सुरक्षाका लागि प्रहरी उपरीक्षकको कमाण्डमा ७ सय ७३ जना प्रहरी परिचालन गर्ने भएको छ।
महानगरीय प्रहरी कार्यालय रानीपोखरीले शुक्रबार पत्रकार सम्मेलन गरेर काठमाडौं प्रहरी परिसरका एसपी प्रद्युम्न कार्कीको कमाण्डमा ७ सय ७३ जना प्रहरी परिचालन गर्ने एआईजी प्रतापसिंह थापाले जानकारी दिए।
थापाका अनुसार सादा पोशाकमा पनि प्रहरी परिचालन गरिनेछ। नेपाल प्रहरीको साथै खेल मैदानमा सशस्त्र प्रहरी बलका सय भन्दा बढी प्रहरी पनि परिचालन हुने भएको छ।थप आवश्यक परे सशस्त्र प्रहरी अरु पनि खटाउन सकिने सशस्त्र प्रहरीका प्रवक्ता डिआइजी शैलेन्द्र खनालले बताए। क्रिकेट मैदानसँगै भित्र पट्टि नेपाल प्रहरीको एक घेरा हुनेछ भने त्यसपछि दर्शकमाझ र दर्शकबाहिर गरी ३ घेरा राखिने प्रहरीले बताएको छ।
नेपाल प्रहरीको घेराबाहिर सशस्त्र प्रहरीले पनि मैदानलाई सुरक्षा दिने प्रहरीले बताएको छ। अन्तर्राष्ट्रियस्तरको खेल भएकाले सुरक्षा पनि अन्तर्राष्ट्रियस्तरकै हुने एआईजी थापाले बताए। खेलाडीहरुलाई होटलदेखि मैदानसम्मको सुरक्षा गर्ने जिम्मा पनि प्रहरीलाई नै दिइएको छ ।
नेपालमा अन्तर्राष्ट्रियस्तरको सुरक्षा प्रदान गर्न आईसीसीले नै पत्र पठाएपछि महानगरीय प्रहरी कार्यालय रानीपोखरीले लिखित रुपमा मैदानमा अपनाइने सुरक्षाका बारेमा लेखेर पठाएको छ। साथै मैदानको सुरक्षाका लागि सीसीटीभी जडान गरिएको छ। मेडल डिरेक्टर र वाक थ्रु गेट जडान गरिएको छ।
दर्शक निगरानी र सुरक्षाका लागि विशेष सुरक्षा अपनाइएको एआईजी थापाले बताए। कीर्तिपुर क्रिकेट मैदान १५ हजार दर्शक क्षमताको छ। खेल अवधिभर उछृङ्खल गतिविधि नगर्न प्रहरीले सबै खेलप्रेमीसँग आग्रह गरेको छ। दर्शकहरुलाई सीसाद्वारा बनेको सामान लैजान पनि प्रतिबन्ध लगाइएको छ।
