सर्जियो अग्युरोको ह्याट्रिकको मदतमा म्यानचेस्टर सिटीले चेल्सीमाथि सानदार जित हात पारेको छ।
इंग्लिस प्रिमियर लिग फुटबल अन्तरर्गत गएराति भएको खेलमा म्यानचेस्टर सिटीले चेल्सीलाई ३–० ले पराजित गरेको हो। जितसँगै म्यानचेस्टर सिटी लिग तालिकाको तेस्रो स्थानमा उक्लिएको छ।
खेलको ३३ औं मिनेटमा गोल गर्दै अग्युरोले सिटीलाई सुरुवाती अग्रता दिलाएका थिए। पहिलो हाफमा एक सून्यको अग्रता लिएको म्यानचेस्टर सिटीले दोस्रो हाफमा थप दुई गोल गर्यो।
खेलको ५४ औं मिनेटमा अग्युरोले व्यक्तिगत दोस्रो गोल गर्दै म्यानचेस्टर सिटीको अग्रता दोब्बर पारे। यस्तै खेलको ७८ औं मिनेटमा चेल्सीका गोलकिपर थिवाउट कोर्टियसले सिटीका फर्नान्डिनोलाई फल गरेपछि रातो कार्ड खाँदै मैदान छोडेपछि चेल्सी १० खेलाडीमा सीमित भएको थियो। त्यसको फाइदा उठाउँदै ८० औं मिनेटमा अग्युरोले गोल गर्दै ह्याट्रिक गर्दै सिटीलाई ३–० को जित दिलाए।
जितपछि म्यानचेस्टर सिटी ३३ खेलबाट ६० अंकका साथ लिग तालिकाको तेस्रो स्थानमा उक्लिएको छ। एक खेल कम खेलेको आर्सनलको भने ५९ अंक छ र ऊ चौंथो स्थानमा छ।
