नेपाली काँग्रेस चितवनले आफ्ना कार्यक्रममा खादाको प्रयोगमा प्रतिबन्ध लगाएको छ।
जलाउँदा वातावरणमा असर गर्ने र गाड्दा पनि नकुहिने भएकाले खादा प्रयोगलाई निरुत्साहित गर्न यस्तो निर्णय गरेको काँग्रेस चितवनका सभापति जितनारायण श्रेष्ठले जानकारी दिए। आजदेखि नै यसलाई कार्यान्वयनमा ल्याएको उनले बताए।
जमिनमा पुरेको खण्डमा समेत कृषि र माटोमा समेत असर गर्ने देखिएको र ढलमा अड्किएको अवस्थामा पनि वातावरणमा असर गरेको पाइएकाले खादा प्रयोग नगर्न काँग्रेसले कार्यकर्तालाई समेत निर्देशन दिएको छ। यसको विकल्पमा गम्छा उपयुक्त हुने जनाइएको छ।
अन्य विकल्पमा फूलमाला, पिपलको पातजस्ता वस्तु प्रयोग गर्दा उपयुक्त हुने भन्दै यस्तो निर्णय गरिएको श्रेष्ठले जानकारी दिए। विभिन्न क्षेत्रमा खादाको प्रयोग गर्नु नहुने भन्दै यसअघि आवाज उठिरहेका बेला काँग्रेसले भने यस्तो निर्णय नै गरेको हो।
यसले ठूलो मात्रामा नेपाली पैसा विदेश गइरहेको समेत काँग्रेसले जनाएको छ। स्वदेशी उत्पादनलाई प्राथमिकता दिनसमेत काँग्रेस चितवनले आह्वान गरेको छ।
वातावरणमा समेत खादाले असर गरिरहेको जनाइएको छ। जिल्लामा उत्पादित फोहरमा खादा अत्यधिक देखिएको छ।
जिल्लामा गएको वर्ष करिब १९ करोडको खादामात्रै बिक्री भएको तथ्याङ्क आएकाले यसरी पैसा खेर नफाल्नसमेत आग्रह गरिएको श्रेष्ठले बताए। आफू पनि नलगाउने र अरुलाई पनि नलगाइदिने घोषणा गरिएको उनले बताए। रासस
