सरकारका मन्त्री तथा विभिन्न राजनीतिक दलका नेता र संचारकर्मीले पत्रकार सूर्यकुमार क्षेत्रीप्रति श्रद्धाञ्जली अर्पण गरेका छन्। ब्रेन ट्युमरका कारण बिहिबार बेलुकी निधन भएका पत्रकार क्षेत्रीप्रति शुक्रबार प्रज्ञा भवनमा पुगेर सरकारका मन्त्री, राजनीतिक दलका नेता र संचारकर्मीले श्रद्धाञ्जली अर्पण गरेका हुन्। नेपाली कांग्रेसका सभापति शेरबहादुर देउवाले पार्टीको झण्डा ओढाएर क्षेत्रीप्रति श्रद्धाञ्जली अर्पण गरे।
सभामुख ओनसरी घर्ती, उपप्रधानमन्त्री तथा सहकारी एवं गरिबी निवारणमन्त्री चित्रबहादुर केसी, अर्थमन्त्री विष्णु पौडेल र सूचना तथा संचारमन्त्री शेरधन राईले प्रज्ञा भवन पुगेर पत्रकार क्षेत्रीको पार्थिव शरीरमा पुष्पगुच्छा अर्पण गरे।
यस्तै, कांग्रेस नेता कृष्णप्रसाद सिटौला, प्रकाशमान सिंह, एन पी साउद्, डा. प्रकाशशरण महत, डा. मिनेन्द्र रिजाल र गगन थापा, नेपाल पत्रकार महासंघका अध्यक्ष डा. महेन्द्र विष्ट लगायत विभिन्न संचार माध्यमममा आवद्ध पत्रकारहरुले पनि क्षेत्रीप्रति श्रद्धाञ्जली अर्पण गरे।
दर्जनौं चर्चित लोकदोहोरी गीत समेत लेखेका पत्रकार क्षेत्री नेपाल प्रेस युनियनका सचिव थिए। क्षेत्रीमा २०७१ सालको मंसिर महिनामा ब्रेन ट्युमर देखिएकामा अन्नपूर्ण न्युरो अस्पतालमा शल्यक्रिया गरिएको थियो। शल्यक्रियापछि नियमित औषधी सेवन गर्दै आएका क्षेत्रीलाई अचानक स्वास्थ्य समस्या देखिएपछि विहिवार साँझ अस्पताल भर्ना गरिएकामा अस्पतालले भर्ना गरिएको केही बेरमै उनलाई मृत घोषणा गरेको थियो।
३३ वर्षीय क्षेत्रीका श्रीमती, एक छोरा तथा माता र पिता हुनुहुन्छ। क्षेत्रीको गृहजिल्ला स्याङ्जामा लगेर अन्त्येष्टि गरिने परिवारका सदस्यहरुले जनाएका छन् ।
