संसद अधिवेशनमा वार्षिक बजेट पेश गर्नु अघि विगतमा हुँदै आएको प्रि-बजेट छलफल प्रक्रिया कटाउने सरकारको तयारीबारे प्रमुख प्रतिपक्षी दल नेपाली कांग्रेसले असहमति जनाएको छ।
कांग्रेस सभापति एवंम् संसदीय दलका नेता शेरबहादुर देउवाले केही सांसदहरुलाई आफ्नै निवासमा बोलाएर शुक्रबार अपरान्ह गरेको छलफलमा संसदमा पेश हुने सरकारको कार्यसूचिको विरोध गरेका हुन्।
कांग्रेस सांसद मीन विश्वकर्माका अनुसार, विगतमा संसदको बजेट अधिवेशनमा शुरुमा प्रि-बजेट छलफल गरी त्यसपछि सरकारको नीति तथा कार्यक्रम र त्यसको आधारमा वार्षिक बजेट पेश हुँदै आएकोमा यसपटक प्रीबजेट छलफलको कार्यक्रम कटाउने प्रस्ताव सरकारले ल्याएको छ। यस विषयमा सरकार र सभामुखसँग पार्टी नेतृत्वले परामर्श गर्ने विश्वकर्माले बताए।
वैशाख २१ गतेबाट शुरु हुने संसद अधिवेशनको तयारीका विषयमा प्रमुख दलका सचेतकहरुसँग सभामुख ओनसरी घर्ती मगरले शुक्रबार गरेकोे छलफलमा सरकारको तर्फबाट कानुन मन्त्रीले प्रि-बजेट छलफल नराखी सरकारको नीति तथा कार्यक्रम र बजेट पेश गरी अगाडि बढ्ने कार्यसूचि पेश गरेका थिए।
उक्त प्रस्तावको विरोध गर्दै कांग्रेस र केही सत्तारुढ दलकै सचेतकले विगतको संसदीय अभ्यास अनुसार शुरुमा प्रि-बजेट छलफल गर्नु पर्ने अडान लिएका थिए।
बैठकमा सहभागी एक सचेतकका अनुसार, प्रि-बजेट छलफलमा सांसदहरुले राखेको राय सुझावका आधारमा सरकारले नीति तथा कार्यक्रम र वार्षिक बजेट पेश गरिनु पर्ने माग गरेका थिए।
त्यसपछि सभामुख घर्ती मगरले यो लगायत संसदको आसन्न अधिवेशन व्यवस्थित रुपमा संचालन गर्ने विषयमा वैशाख १९ गते पुनः छलफल गरी अगाडि बढ्ने जानकारी सचेतकहरुलाई दिएकी थिइन्।
