पत्रकार तथा साझा यातायातका अध्यक्ष कनकमणि दीक्षितको मुद्दामा भइरहेको बहसका क्रममा पत्रकारलाई इजलास छिर्न रोक लगाइएको छ। सर्वोच्च अदालत आफैंले पत्रकारहरूका लागि जारी गरेको पास ‘विशेष दिन भएकाले काम नलाग्ने’ भन्दै अदालतले रोक लगाएको हो।
वकिलसँग इजलासमा पुगेका हिमालयन टाइम्सका पत्रकार रामकुमार कामतलाई प्रहरीले बाहिर निकालेको छ। ‘सधैं प्रवेश गर्दा देखाउने गरेको कार्डले काम नगरेपछि हामी बाहिरै बसिरहेका छौं,’ सर्वोच्च अदालतबाट सेतोपाटी संवाददाता शोभा शर्माले भनिन्।
प्रवेश पास देखाउँदा पनि नदिइएपछि पत्रकारहरू सर्वोच्चका सहायक प्रवक्ता विश्वराज पौडेलकहाँ पुगेका थिए। उनले ‘आज विशेष दिन भएकाले’ प्रवेश दिन नसकिएको बताएका छन्। ‘आज सधैं देखाउने गरेको पासले हुँदैन,’ पौडेललाई उद्धृत गर्दै शर्माले भनिन्।
पत्रकार दीक्षितको मुद्दामा अहिले सुशीला कार्की र जगदीश शर्मा पौडेलको इजलासमा बहस भइरहेको छ। शर्माका अनुसार पहिले भीड छ भन्दै प्रहरीले रोकेको थियो, पछि नमिल्ने भन्दै प्रहरीले कामतलाई बाहिर निकाल्यो।
भ्रष्टाचार आरोपमा पत्रकार दीक्षितलाई अख्तियारले पक्राउ गरेपछि उनकी श्रीमती शान्ताले सर्वोच्चमा बन्दी प्रत्यक्षीकरणको रिट दायर गरेकी थिइन्।
