संयुक्त राष्ट्र संघका नायव महासचिव यान इलिएसनले पुनर्निर्माणका कामहरु सही दिशामा अघि बढेको भन्दै त्यसमा अन्तर्राष्ट्रिय समुदायको साथ रहेको रहेको बताएका छन्। ललितपुरको बुङमतीमा स्थानीयसहित प्राधिकरणका प्रमुख कार्यकारी अधिकृत सुशील ज्ञवालीसँगको कुराकानीमा नायव महासचिव यानले नेपालमा पुनर्निर्माणको प्रक्रिया योजनाबद्ध रुपमा बढेकामा आफू उत्साहित भएको र थप सहयोग गरेर अघि बढने बताए।
‘यति ठूलो विपत्तिले भत्काएको संरचनाहरुको पुनर्निर्माण गर्न चुनौतीपूर्ण छ। त्यसलाई सम्झेर अहिले आत्तिन हुँदैन,' नायब महासचिव यानले भने, 'लगातार लाग्दै गर्यौं भने सफलता प्राप्त हुन्छ। पाइला-पाइला चाल्दै गएपछि बलियो र राम्रो संरचना बनाई पुनर्निर्माण सम्पन्न गर्न सकिन्छ।’
उनले सरकारका साथसाथै अन्तर्राष्ट्रिय समुदाय, निजी क्षेत्र, नागरिक समाजसँगको सहकार्य र साझेदारीमा मात्र विपद्पछिको पुनर्निर्माण सम्भव हुने धारणा राखे। नायव महासचिव यानले नेपालमा भइरहेको कामहरुलाई लिएर टर्कीमा आयोजना हुने अन्तर्राष्ट्रिय सम्मेलनमा आफूले कार्यपत्र पेश गर्ने जानकारी दिए। उनले स्वदेशी र विदेशी सीप र क्षमतालाई प्रयोग गरेर अघि बढ्न पनि प्राधिकरणका प्रमुख कार्यकारी अधिकृत ज्ञवालीलाई सुझाव दिए।
