केही समय वा महिना भयो उपत्यका ट्राफिकको नेतृत्व परिवर्तन भएको। नयाँ नेतृत्वले केही परीवर्तन गर्न खोज्नु भएको छ, मतलब आधुनिकीकरण गर्न खोज्नु भएको छ। यसमा हामीले प्रशंसा गर्नै पर्छ भन्ने म ठान्छु।
तर, कतिपय स्थानमा ट्राफिक व्यस्थापन हिजोको भन्दा दयनीय बन्दै गएको दृष्टान्त पनि छन्। लेन अनुशासनको कुरा गरिरहे पनि सिमित स्थानमा मात्र यो लागू भएको छ। त्यो पनि ट्राफिक रहेको स्थानहरुमा मात्र।
ट्राफिकको नजर नपुग्ने स्थानमा केही परिवर्तन भएको छैन। केही स्थानमा सडक किनारमा फुटपाथ र ड्रेन निर्माणको काम भइरहेको छ। हप्ता दिनमा सकिने काम पनि महिना दिन हुँदासम्म सकिएको छैन । सडक सुन्दरता कुरुप बनेको छ ।
आकाशे पुलको छेउबाट तलैबाट असुरक्षित तरीकाले बाटो काटिरहेका छन् यो कसले नियन्त्रण गर्ने। त्यो यही सडक हो पैदल यात्रीले जथाभावी सडक पार गर्दा केही समय यथास्थान प्रहरी कष्टडीमा बस्नु पर्दथ्यो जरीवाना तिर्नु पर्दथ्यो। त्यो अहिले एकादेशको कथा बनिसकेको छ।
किन ब्यक्ति परीवर्तन भएपछि सिस्टम परिवर्तन हुन्छ। राम्रो कुरालाई त निरन्तरता दिन सक्नुपर्छ। ट्राफिक प्रहरीमा प्रमुख परिवर्तन हुनासाथ केही न केही नयाँ कुरा ल्याउने गरिन्छ तर ती कुरालाई निरन्तरता दिन सकियो सकिएन बिश्लेषण गर्न जरूरी छ।
नयाँ आउने प्रमुखहरुले पनि पूर्वप्रमुखहरुले गरेका राम्रा कामहरुलाई निरन्तरता दिन सकियो भने मात्र पनि काठमाडौंको ट्राफिक व्यवस्थापनमा राम्रो सुधार हुन सक्छ।
उपत्यका ट्राफिकलाई तत्काल निम्न कार्य सुधार गर्न अनुरोध गर्दछु।
१- जथाभावी पार्किङ नियन्त्रण गर्ने ।
२- जथाभावी U Turn निषेध गर्ने जसले गर्दा ट्राफिक जाम हुने गरेको छ।
३- Lane System सबै स्थानहरुमा लागू गर्ने।
४- माइक्रो चालकको अराजकतालाई नियन्त्रण गर्ने ।
५- समय समयमा आकाशे पुल प्रयोग गर्न अभियान चलाउने ।
६- कतिपय जक्सन भएको स्थानमा ब्लक राख्नुपर्ने।
७- जेब्रा क्रसमा Pedestrian लाई प्राथमिकता दिन अभियान चलाउने।